Kinahanglan ba nga magborn again para maluwas kita?

Maayong Adlaw kaninyo igsoon, unsa ba kining Born Again Christian? Kinahanglan ba nga ma born again kita para maluwas? Salamat Ako si Arnold Lumba of Padada, Davao Del Sur. 0918-4432…

Usa sa mga pinaka-kusog ug paspas nga midako karon nga mga pundok  o sekta mao ang mga Fundamentalists. Gilangkoban kini sa mga ginatawag nga  mga BORN AGAIN CHRISTIANS. Gani daghan ang mga magtotoo ang nakabig niini, ug usa sa pinaka-sentro nga ilang pandani mao ang pag-gamit ug Bibliya uban sa pagtudlo nga dawaton lang nimo ang Ginoong Hesukristo nga imong personal nga manluluwas ug mutoo ka lamang maluwas kana. Para kanila FAITH ALONE saves.

Kini nagsukad nga pagtulun-an niadtong 15th century lang sa dihang migawas si Martin Luther sa matuod nga Simbahan ug usa sa pagtulun-an SOLA FIDE O FAITH ALONE. Tumoo ka lamang luwas kana. Karong panahona daghan ang misunod niini nga pagtulun-an nga wala gitudlo sa Ginoong Hesukristo maingon man sa iyang mga Apostoles.

Mahinomdoman nga si Martin Luther mao ang usa sa hinungdan sa pagdaghan karon sa mga sekta ug siya ang nahimong amahan sa Protestantismo nga nakabahin sa pagtulun-ang Kristiyanismo.

Dili gayud tinuod nga PAGTOO lang luwas na kita. Angay natong hisayran nga ang Ginoong Hesukristo nag-ingon nga ang nagatoo kanako kinahanglan nga magabuhat usab (Juan 14:12), kay kita hukman man dili sa pagtoo lamang kondili sa binuhatan usab (Pinadayag 20:12 ug 2 Cor. 5:10).

Kung pagtoo lang maoy atong sundon siguro bisan pa ang yawa maluwas, kay diha sa Santiago 2:19 ang yawa nagatoo usab. Gani gakurog pa tungod sa ilang pagtoo. Mao nga si Kristo miingon kung gusto ka maluwas sunda ug tumana ang akong mga sugo (Juan 14:15), kay ang pagtoo nagabuhat pinaagi sa gugma (1 Cor. 13:2).

Si Apostol Santiago nag-ingon nga “PATAY ANG PAGTOO KUNG WALAY MGA MAAYONG BUHAT” (Santiago 2:14,26), kay ang pinaka-sakto nga angay tang buhaton aron kita maluwas magpasakop sa Simbahan ni Kristo (Mateo 16:18-19, Efeso 5:23), motoman sa mga kasugoan sa Dios, ug sa Simbahan (Juan 14:15, Lucas 10:16), pagtoo nga tinooray gayud uban sa mga pagdebosyon, pag-ampo ug pagbuhat ug maayo, ug pagkinabuhi sa grasya pinaagi sa pagdawat sa lawas ug dugo ni Kristo diha sa Santos nga Misa (Juan 6:54-56, Colosas 3:16, Buhat 20:7, Roma 12:1 Marcos  24:38, 1 Tes. 5:17, 2 Cor. 13:7, Mateo 21:22, Juan 16:24), pagmalahutayon sa kanunay hangtud sa katapusan (2 Tim. 4:18, Mateo 24:13, Juan 15:5).

Kinahanglan ang Simbahan o Iglesia ug dili lamang ang pagdawat kang Kristo. Ang pagtudlo nga dili kinahanglan ang Simbahan usa ka pamaagi sa paghisalaag kanato ngadto sa kamatuoran nga  giwali sa Ginoong Hesukristo ug sa iyang mga Apostoles. Dili gayud mahitabo nga si Kristo ug ang iyang Simbahan managbulag o magkasumpakiay sa usag-usa. Mao kini ang kamatuoran, giluwas kita ni Kristo pinaagi sa iyang Simbahan. Husto ang pag-ingon nga si Kristo maoy atong bugtong manluluwas dinhi sa kalibutan (Buh.4:12), ug siya ang atong tigpataliwala tali sa Dios ug sa tawo (1 Tim. 2:5), ug ang iyang sakripisyo sa Krus ug pag-ula sa dugo maoy nakaluwas kanato (Hebreo 9:22).

Angay pod natong hinomdoman nga si Kristo nagtukod usab ug Simbahan (Mateo 16:18). Siya nagpili, nagtudlo ug nagpadala ug mga punoan o lider aron sa pagdumala niini dinhi sa kalibutan ug nagtugyan ug gahum ug awtoridad sa pagdumala (Mateo 16:19, Mateo 18:18), ug nagsugo kanila sa pagsangyaw sa ebanghelyo, pagbunyag ug pag-giya sa iyang katawhan (Mateo 28:19-29). Kining tanan nagapadayag gayud nga ang Simbahan dako gayud ug kalabotan sa atong kaluwasan ug sukwahi gayud sa ginawali sa pipila ka mga sekta nga dawaton lamang nato si Kristo luwas na kita, sayop gayud kana kay dili pwede ibulag si Kristo ug ang iyang Simbahan, kay ang Simbahan lawas ni Kristo (Colosas 1:18). Gani siya nahigugma ug nagatahod sa iyang lawas nga mao ang Simbahan o Iglesia (Efeso 5:25-27), ug ang Simbahan mao ang haligi ug sukaranan sa tanang kamatuoran (1 Tim. 3:15), ug mao ang iyang pagaluwason (Efeso 5:23).

Busa ang Simbahan instrumento aron kita maluwas kay dinhi nato makaplagan ang grasya ug kamatuoran sa atong pagtoo, kay sa maong Simbahan gibilin ni Kristo ang iyang mga pagtulun-an. Ug ang mga nagawali nga si Kristo lang ang dawaton ug dili na kinahanglan ang Simbahan usa ka BAKAK ug dili kompletong Kristo ang imong giila kay si Kristo maoy ULO SA IGLESIA O SIMBAHAN NGA MAO ANG IYANG LAWAS (Colosas 1:18).