Katubagan sa mga Pangutana (Sign of the Cross)

Kanimo Brod John ug Ronald nganong kailangan pa man nga manguros inig human ug pangaliya sumala sa naandan sa akong tan-aw pinaagi sa mga Apostoles wala sila nag-sign of the Cross? Manghinaut ko sa inyong tubag. This is Edward A. Opong of Don Marcelino, Salamat Dalaygon ang Dios 0921-381****

“Ang PAGPANGUROS mao ang pagpadayag sa duha ka importanteng misteryo sa atong pagto-o isip Kristiyanos. Una, mao ang pagpadayag nato sa misteryo sa Santisima Trinidad. Ikaduha, mao ang pagpadayag sa pagpangluwas o redemption. Sa dihang moingon kita ug “SA NGALAN” atong gipadayag ang kamatuoran nga adunay USA lamang ka DIOS (1 Cor. 8:6).

Sa dihang moingon kita ug “SA AMAHAN, ANAK UG ESPIRITU SANTO”, atong gipadayag diri ang tulo ka managlahi nga Persona sa Dios (Mat. 28:19-20). Sa dihang atong i- porma ug Krus sa atong lawas dungan sa paglitok sa ngalan sa Amahan, sa Anak ug sa Espiritu Santo dinhi atong napadayag ang dakong kamatuoran nga ang anak sa Dios nagpaka-tawo, nagpasakit ug nagpa-kamatay aron pagluwas kanato pinaagi sa Krus, kay ang Krus maoy gigamit nga kahimanan aron pagluwas kanato (Mat. 27:35).

Mao nga si san Pablo nag-ingon nga ang Krus alang sa mga ginaluwas gahum kini sa Dios, apan lang sa mga nagka-laglag usa kini ka binuang (1 Cor. 1:18), ug ang Krus gihimaya ug gipasigarbo kini uban sa pagpatik sa lawas (Gal, 6:14,17). Ang Pagpanguros timaan kini siya nga kita iya ni Kristo ug kita matuod nga Kristiyanos, kay ang pagtimaan nato sa Krus agi ug pagpatik sa lawas simbolo kini siya sa pagluwas kanato, mao nga angay natong hinomdoman nga ang timaan sa Krus makuha nato ang mga panalangin sa Dios ug maprotektahan kita batok sa mga katalagman ug uban pang kadaut ma-ispiritwal man o ma-pisikal. (Ezequiel 9:4-6).”

Gdpm kaninyo mga igsoon, hinaut unta nga dili kamo mo-undang sa inyong paghatag ug mga pagpasabot  bahin sa atong pagtulun-an ug luyo sa inyong mga kalisdanan ug mga panginahanglanon pag-ampo lang gayud ang akong matabang ug ako usab naga-ampo nga adunay motabang kaninyo aron nga makapadayon mo sa inyong apostolado. God bless! From Flor of San AntonioAgdao, D.C. 0919-412****

“Salamat igsuong Flor sa imong mensahe ilabi na sa imong mga pag-ampo mao gayud na ang among unang gikinahanglan luyo sa among paningkamot sa pagsangyaw uban sa tabang ug giya sa atong Simbahan. Ug subo lamang pamalandongon nga usahay lisod pod ang among bulohaton ilabi na nga kulang pod kami sa mga resources  ug pinansyal nga suporta mao nga at least sa ginagmay nga paagi uban sa tabang sa Dios nagapadayon gihapon ang among apostolado, busa usahay nagahangyo kami niadtong mga adunay grasya nga unta mo-bulig sila ilabi na sa among bulohaton nga magpadayon ug uban sa inyong mga pag-ampo.”