“Gitandog sa Dios, Gigasahan sa Pagtoo”

Nikabat sa 86 ka mga pari nga nag-alagad sa Arkidyosis sa Davao ang hiniusang nagtuki aron ipaklaro kung unsa ug unsaon pagpadayon sa pagpadagan ang kasamtangang mga Gagmay’ng Kristohanong Katilingban (GKK).

Nagbinayloay sa mga kasinatian ug huna-huna ang mga kaparian nga pinangulohan ni Arsobispo Romulo G. Valles, kinsa naglantaw niining mga GKK isip katawhang “gitandog sa Dios, gigasahan sa pagtoo.”

Gihimo didto sa Northcrest Resort, Buhangin niadtong Mayo 12, nagkahiusaha ang mga magbalantay sa Kristohanong panon sa ilang pagsuta sa kaimportansiya sa GKK binasi sa Guidelines and Norms on GKK and the Sacraments nga gipagula niadtong 1996 aron pag-implementar sa APAD II.

Ang pagpaklaro resulta sa pipila ka vicariate consultations ug meetings nga gihimo sa mga kaparian sukad niadtong 2009 atol sa Diamond Jubilee Year hangtud niining bulana ilabina sugod niadtong Marso niining tuiga.

Ang 7 ka vicariates sa Archdiocese of Davao: Sacred Heart, Immaculate Conception, Sto. Rosario, San Pablo, St. James, Sta. Ana ug San Pedro nga gilangkoban sa 38 ka mga parokya, naghimo sa ilang kaugalingong leveling-off kauban ang mga kaparian aron masabtan nila ang mga gipasibaw aron matin-aw ang mga isyu mahitungod sa pagtukod, mga miyembro ug opisyales, IDS, mga kalihukan, relasyon sa parokya ug uban pa sa estado sa GKK karon.

“Dili ni dali-dali. Giluto ni hinay-hinay,” sumala ni Abp. Valles.

Giingon niya nga pamaagi sa maong leveling-off nga makapartisipar ang mga kaparian sa pag-revisit ug pagtan-aw sa mga importanteng butang kabahin sa GKK, nga sumala niya, gasa nga kabahin sa kinabuhi sa simbahan sa mga milabay’ng mga tuig.

Gitimonan kining maong tigum nila ni Pastoral Director ug Auxiliary Bishop George B. Rimando, GKK Director Fr. Pete Lamata ug ReMaSe Rector Msgr. Abel Apigo.

Gikalipay usab sa kadaghanan nga mitambong nga beterano ug batan-ong pari sa Archdiocese of Davao kauban ang mga relihiyosong kaparian.

Kining maong kalihukan pagpangandam sa panag-uban unya sa mga pari ug mga laykong lideres sa mga GKK nga magtigom sa Regional Major Seminary of Mindanao karong umaabot nga Mayo 26-28.

Ang pagpaminaw ug pagkonsulta sa tingog sa mga laykong lideres sa GKK nianang higayona kabahin sa pagsaulog sa Tuig sa mga Layko.