Asa Ka Padulong?

Ikalimang Domingo Sa Pagkabanhaw
Buhat 6:1-7/ Ps. 33:1-2, 4-5, 18-19/ 1 Pd. 2:4-9/ Jn. 14:1-12

Nasinati mo ba nga ikaw nahisalaag? Tin-aw ba kanimo ang imong padulngan? Nabati mo ba nga ang kinabuhi dunay kahulogan?

Matud pa ni Santo Papa Francisco sa iyang sulat-apostoliko Evangelii Gaudium kon Kalipay sa Ebanghelyo, daghang mga tawo karon nagpuyo nga masulob-on ug magul-anon. Sila nawad-an na sa kainit sa pagbuhat sa maayo, wala na nabati ang gugma sa Ginoo kanila, ug nakubalan na ang konsensiya.

Ang mga pagbasa karon nag-awhag kanato sa pagpuyo sama sa unang mga tinun-an ni Kristo. Sa unang pagbasa, nagpabilin silang mainiton sa pagbuhat sa maayo. Naghuna-huna sila sa pag-atiman sa mga biyuda nga labing nanginahanglan niadtong panahona, ug sa dili pagbiya sa ministriya sa pag-ampo ug pagsangyaw sa pulong. Sa atong kinabuhi karon, andam ba kitang mosanong kung ang atong talento, bahandi ug panahon gikinahanglan sa katilingban? Malipayon ba kitang motabang sa uban nga moduol kanato?

Sa ikaduhang pagbasa, si Pedro nagpahimangno sa mga magtutoo nga sila labing pinangga sa Dios. Sila gihigugma sa Dios isip piniling katawhan, parianon ug balaan. Sila gipanag-iya sa Dios ug gipalingkawas sa kangitngit aron magpuyo sa kahayag. Sa atong pagpaningkamut, nakita ba nato ang dakung tabang ug pagluwas sa Dios? Nagdayeg ba kita Kaniya tungod sa trabaho nga iyang gihatag kanato, sa kahibalo ug kahimsug nga atong naangkon, sa kalinaw sa palibot ug sa mga tawo nga nagmahal kanato?

Sa Ebanghelyo, si Kristo mihagit sa Iyang mga tinun-an sa pagpaminaw ug pagsinati Kaniya sulod sa ilang kasing-kasing ug dili lamang kutob sa makita sa ilang mga mata. Siya nagpasabot kanila nga Siya ug ang Amahan usa lamang nga naglihok sulod ilang kinabuhi. Sa atong pagpuyo, nailhan ba nato ang Dios sa matag higayon nga kita modesisyon ug mopili unsay atong himuon? Nadunggan ba nato ang Iyang tingog pinaagi sa atong konsensiya diha sa atong mga gibuhat?

Kung ang kainit sa pagbuhat sa maayo kanato nagpabilin, ang gugma sa Dios kanato atong nabati, ug nga nailhan nato kanunay ang Dios diha sa pagsunod nato sa atong konsensiya, tataw ug klaro gayod kanato asa kita padulong.