Ang pagsangpit ug tabang sa mga Santos

Mga kaigsoonan bag-ohay lang diin opisyal nga gedeklarar ni Papa Francisco nga Santos ang duha ka kanhing Santo Papa nga si  Juan Pablo II ug Papa Juan XXIII. Sila idugang na sa mga listahan sa mga Santos sa Langit.

Kini usa ka pagpadayag nga luyo sa pagka-dautan sa tawo aduna gihapoy  mga tawo ang mamahimong balaan kon kita maningkamot aron makab-ot nato ang pangandoy sa Dios nga kita magpaka-balaan: “pagbalaan kamo kay ako balaan man” 1 Pedro 1:16. Busa sila si San Juan Pablo II ug San Juan XXIII usa lamang sa mga minilyon ka mga balaang tawo ang maingon nato nga ehimplo aron kita usab maningkamot niining kinabuhia.

Sayud kita sa kinabuhi niining duha ka Santos sa pagtuman gayud sa ilang mga bulohaton nga gisangon kanila sa Dios ug nagpuyo sila sa pagka-balaan sa tibuok nilang kinabuhi. Kinsa man kining mga Santos? Angay ba sila nga atong tahuron o ampoan ba?

Ang mga Santos mao kadtong mga balaang tawo nga sakop sa Simbahan ni Kristo nga nagkinabuhi subay gayud sa kabobot-on sa Dios ug naghimo sa hataas nga balaanong buhat sa gugma ngadto sa isigkatawo ug sa Dios.  Gigantihan sila nga mahilangit ug makauban ug makita ang Dios o beatific vision nganha sa iyang gingharian. Ang mga tawo nga nahilangit na angay na gayud natong tahuron ug may gahum na aron sa pagtabang kanatong mga buhi pinaagi sa ilang mga pag-ampo.

Adunay dili malalis nga kamatuoran nga natala diha sa Bibliya mahitungod sa mga tawong Balaan nga samtang buhi pa makatabang na sa katawhan pinaagi sa ilang mga pag-ampo. Pananglitan diha sa Job 42:8-“si Job usa ka maayong tawo, busa sa dihang adunay tulo ka tawo nga nakasala batok sa Dios ug naka-amgo sa ilang nabuhat human naghinulsol ug nangayo ug pasaylo sa Dios, ang Dios miingon kanila nga maghalad kamo ug mga sinunog nga halad…ug si Job maoy mag-ampo alang kaninyo”.

Dinhi atong masayran nga dili diay tinomotumo sa tawo ang paagi nga moagi kita o mohangyo sa panabang sa mga tawong BALAAN alang kanato, kay kini usa ka pamaagi ug pagmando sa Dios. Si Sr. Santiago Apostoles ni Kristo miingon nga “ ANG PAG-AMPO SA TAWONG MATARONG O BALAAN DAKO UG KAHIMOAN” (Santiago 5:16). Busa usa kini ka pruyba nga dili dautan nga kung kita nga mga buhi mag-ampo ug moagi sa mga BALAAN kay ang kasulatan nag-ingon nga daku kini ug kahimoan. Kay ang pag-ampo nato sa mga SANTOS dili kana PAGSIMBA KANILA ingon nga DIOS, kondili mitahud kita kanila ingon nga mga ALAGAD SA DIOS (Daniel 2:46).

Ang atong pag-ampo kanila dili ingon nga mangayo kita ug kaluwasan kondili unta i-ampo ta nila sa Dios nga  kaloy-an ta ug hatagan pa ug igong grasya nga makalahutay ta sa kanunay kay bisan gani si San Juan nakita niya sa iyang panan-awon nga ang mga BALAAN  sa langit nag-ampo kanunay, adlaw ug gabii sa walay hunong ug maoy nagdala sa mga pag-ampo sa katawhan (Pinadayag 5:8, 6:9-10)

Busa ang pag-ingon nga sayop ang pag-ampo sa mga Santos usa lamang ka dakong pasangil kanato nga mga Katoliko ug walay saktong basihan diha sa kasulatan. Kay bisan ang Ginoong Jesukristo mismo miingon nga mangita kita ug abyan dinhi sa kalibutan (Lucas 16:9), ug kanang abyan nga giingon ni Kristo mao kanang mga Santos sa langit. Giingon ni Ginoong Jesukristo nga ang magpasidungog sa iyang balaang katawhan nagapasidungog pod kaniya (Juan 17:10). Ang pagdangop nato ug tabang sa mga Santos bililhon kini ug mapuslanon gayud alang kanato kay ang mga Balaan o Santos atua naman sa langit ug duol sila sa presensya sa Dios.