Ang Kasal

Brod Maayong hapon si Alex ko, Ask lang ko sa sakto nga pagpasabot anang espesyal ug ordinary nga kasal, unsa daw na? 0907-2719……

Good day Brod Alex,  Ang Kasal sagrado. Kini usa sa pito ka sakramento nga gitukod sa Dios sukad pa sa sinugdanan sa pagbuhat niya sa tawo (cf. Gen. 2:24). Diha sa kaminyoon, pinaagi sa pagpa-kasal mao ang mohiusa sa lalaki ug babaye aron sila mausa sa tibuok nilang kinabuhi  aron sa pagtukod ug usa ka PAMILYA. Subay kini sa gipamulong ni Hesukristo: “gibuhat sa Dios ang lalaki ug babaye tungod niini, mobiya ang lalaki sa iyang amahan ug sa iyang inahan ug makig hiusa sa iyang asawa. Ug silang duha mahimo nang usa. Busa ang bana ug ang asawa dili na duha, kon dili usa na lamang. TUNGOD NIINI KINAHANGLAN NGA DILI BULAGON SA TAWO ANG GIHIUSA SA DIOS” Mark 10:5-9. Busa ang tawo nga gikasal na diha sa Simbahan gibugkos na sa Dios ug wala nay bisan kinsa nga tawo nga pwede mopabulag niini subay sa sugo ni Hesukristo.

Nganong adunay ordinaryo ug espesyal nga kasal, kana iya lamang sa kagustohan sa tawo o magtiayon nga gusto magpakasal. Sa tinuod lang walay ordinaryo o espesyal atubangan sa Dios ilabi na sa maong sakramento sa kaminyoon. Apan adunay kasal nga ginahimo nga usa ra ka partisan kon indibiduwal nga kasal nga kaniadto nailhan nga espesyal nga kasal, ug adunay puy kasal nga uban sa kadaghanan kon uban sa daghang mga partisan.

Kasagaran, ug atong masabtan nga ang indibiduwal nga kasal mahal tungod kay bungga gayud ug adunay daghang mga abay ug gigastohan og mga dekorasyon ug mga bulak ang sulod sa Simbahan. Apan atong hinumdoman nga  ANG MISA UG SEREMONYAS NGA PAGAHIMOON SA MAONG KASAL PAREHO LANG SA GINATAWAG USAB NGA ORDINARYONG KASAL, UG KINI WALAY  KALAINAN, PAREHO LAMANG NGA PANALANGIN  ANG MADAWAT.

Sama pananglitan nga kon  motan-aw kita ug  ug palabas sa sinehan adunay orchestra o sa ubos nga bahin sa senihan apan barato lamang ang bayad ug  adunay balcony o sa ibabaw nga bahin sa senihan nga diin mahal ang bayad, kon imong sabton pareho lang nga palabas ang imong gitan-aw. Wala magpasabot nga kon sa balcony ka mas maayo nga palabas ang imong gitan-aw nga lahi sa orchestra, pareho lamang kini. Ang importante sa kasal mao gayud ang Misa ug seremonyas sa panaad ug pagdawat isip magtiayon nga pagahimoon sa Pari uban sa mga witnesses o ninong ug ninang. Wala nay lain pa gawas niini. Ang entourage o mga abay ug mga dekorasyon dayan-dayan lamang kana sa maong kasal nga maoy makapamahal sa mga galastohun wala pay labot ang uban pang mga preparasyon ug reception sa kasal.