Ang Dignidad ug Misyon sa Mga Layko “Ganito Noon; Paano Ngayon?”

(Giandam ni Fr. Ronald Lunas)
Ikanapulo nga Bahin

11. Asa kutob ang misyon sa mga Layko?

a.   Vaticano II misulay sa pagpaklaro sa misyon sa mga layko pinaagi sa paglarawan niini. Ang misyonerong kalihukan nga angay sa mga layko naglangkob sa Simbahan ug sa kalibutan. Ang misyon sa mga layko alang sa pagpalambo sa Simbahan ug sa pagbag-o sa kalibutan.

b.   Sa ilang misyon ngadto sa Simbahan, ang mga layko:

–     Mamahimong kabahin sa ministriya sa pulong isip magtutudlo, katekista ugmisyonero sulod o gawas sa ilang parokya (AA 9);

–     Motampo og panahon o kabtangan ngadto sa apostolikanhong paningkamot (lokal man o nasyonal);

–     Mopaambit og suporta ug tambag ngadto sa ilang mga pastor ug kaobispohan;

–     Mamahimong kabahin sa mga konsilyo diin ilang dad-on ngadto sa pagtagad sa mga pangulo sa Simbahan ang mga kasamtangang suliran nga nanginahanglan og Kristohanong pagsabot ug sulbad (AA 10);

–     Mamahimo usab nga hatagan sa katungdanan sa hirarkiya diha sa Simbahan alang sa espirituhanong katuyuan (LG 33).

c.   Sa ilang misyon ngadto sa kalibutan, ang mga layko:

–     Sa dili direktang paagi, moandam sa kalibutan alang sa binhi sa Ebanghelyo pinaagi sa panig-ingnan sa ilang kaugalingong kinabuhi, pinaagi sa ilang mga maayong buhat sa pagtukod sa usa ka mas makiangayong katilingban, ug sa pagdalit sa kalibutan sa mga Kristohanong hiyas (LG 31);

–     Adunay lisod apan bililhong katungdanan sa pagbag-o sa kalibutan;

–     Moatiman sa namugnang kalibutan;

–     Pinaagi sa ilang kahibalo ug katakus, mopalambo sa kalibutan ug modala sa mga posibilidad niini ngadto sa angay nga katumanan, ug sa pag-andam niini alang sa Gingharian (GS 43);

–     Mobag-o sa tawhanong katilingban nga nagumon sa sala; mobag-o sa mga katilingbanong gambalay alang sa kalamboan sa tanan (GS 37);

–     Mopahigayon sa mga buhat sa kalooy alang sa mga kabus kay kini “katungdanan sa mga layko” (AA 13);

–     Sigurohon nga ang matag tawo makabaton bisan na lang sa pinakamenos nga kaayohan nga hatod sa kultura, sama panaglitan sa trabaho, ensaktong suhol, edukasyon (GS 60, 67);

–     Kabahin sa kalibutan sa Mass Media (IM 13) ug social media;

–     Moapil sa pamulitika (GS 75; AA 14);

–     Apan ang nag-unang gimbuhaton sa layko nga anaa sa hunahuna sa Vatikano II mao ang pagtukod ug Kristohanong pamilya. Dili lang unang katungdanan sa mga layko kondili ila usab nga tampo sa kasulbaran sa mga hinanaling suliran nga giatubang sa katawhan karong panahona (AA 11). Ang konsilyo nanawagan sa mga layko nga palamboon ang ilang espirituwalidad sa pamilya aron mohimo sa ilang mga pamilya nga tunghaan sa kabalaan (LG 35), sa mga katilingbanong hiyas (Gravissimum educationis 3), ministriya (LG 32), us sa isyu sa katilingban ug sa pamilya (GS 52). Ang mga layko mohimo gayod sa ilang mga pamilya nga Simbahan sa panimalay (LG 11), ug makig-uban sa ubang pamilya alang sa suporta sa usa’g usa (AA 11).

–     Sa paaging direkta, himoon nilang presente ang Simbahan diha sa kalibutan sa pagdala sa maayong balita, sa ebanghelyo, ngadto sa dili mga magtotoo pinaagi sa pagpasabot kanila sa Kristohanong baroganan o sa pagpanalipod niini (AA 13). Si San Juan Pablo II, niadtong 1988, naghisgot na gani sa papel sa mga layko diha sa pagsangyaw pag-usab sa ebanghelyo (re-evangelization; new evangelization) sa dokumentong Christifideles Laici (CL 34). (Ipadayon sa sunod isyu)