Ang Dignidad ug Misyon sa Mga Layko “Ganito Noon; Paano Ngayon?”

(Giandam ni Fr. Ronald Lunas)
Ikawalo nga Bahin

8. Unsay estado sa mga layko diha sa Simbahan?

a.   Ang mga nabunyagang layko, dili lamang ang naordinahan, miambit usab sa parianon, propetikanhon, ug harianong gimbuhanon ni Kristo. Miambit sa parianon, propetanhon, ug harianong gimbuhaton ni Kristo, ang layko adunay katungdanan alang sa “misyon sa kinatibuk-ang Kristohanong katawhan ngadto sa Simbahan ug sa kalibutan (cf. AA 1, 10).

b.   Matag usa adunay samang tawag. Ang tanan gitawag sa pagka-kabahin sa katukuran sa Lawas ni Kristo. Kini gipadayag diha sa nagkalainlaing pagpangalagad ug nagkalainlaing mga gasa. Maingon nga adunay linahing tawag ngadto sa orden, ang pagtulun-an sa Konsilyo mahitungod sa mga charismata (mga gasa sa Espiritu Santo) mipatin-aw nga ang pagka-Layko usa usab ka espesyal nga tawag. Kining kahimtang sa panagsama maoy sangputanan sa gasa sa Espiritu (LG 12, 31).

c.  Ang layko-clerico nga kalainan, kaniadto, gigamit sa paghisgot sa duha ka matang sa magtotoo diha sa Simbahan; karon, gigamit kini sa Konsilyo sa paghisgot sa gimbuhaton. Ang mga naordinahan ug ang mga layko usa lamang ka katawhan sa Dios pinaagi sa bunyag. Maghiusa sila sa pagtrabaho ug magsalig sa usa’g usa sa tabang nga gikinahanglan aron makab-ot ang hiniusang tumong sa Simbahan, kana, ang kaluwasan. Ang mga kaparian mapaubsanong mahinumdom nga dili lamang sa ilang mga abaga nga gimbut-an ni Kristo nga ipahimutang ang tanang makaluwasnong misyon (LG 30). Apang tungod kay gikinahanglan alang sa mabungahong buhat sa mga layko ang ilang kahiusahan kang Kristo, kinahanglan makiglambigit ug makighiusa ang mga layko sa ilang mga pastor nga mao ang sulugoon sa pulong ug mga ministro sa mga sakramento (AA 4) ug andam modawat sa pagsaksi sa mga konsagradong mga lalaki ug babaye tungod ka yang kalibutan dili mabag-o nga wala ang espiritu sa “pagkabulahan” sumala sa pagsangyaw ni Hesus (LG 31).