Ang Dignidad ug Misyon sa Mga Layko “Ganito Noon; Paano Ngayon?”

(Giandam ni Fr. Ronald Lunas)
Ikanapulo’g  usa nga Bahin

12.  Asa kining kasinatian ug pamalandong mahitungod sa pagka-layko padulong?

a.   Ang Laykong kinabuhi human sa Vaticano II dili na gayud sama kaniadto. Ang Konsilyo nagbag-o sa direksiyon sa Simbahan ug mihatag ug pagtagad sa mga bag-ong prioridad. Kining bag-ong direksiyon ug prioridad nag-apil sa mga layko. Ang apostolado sa mga layko sulod sa Simbahan ug ang pag-alagad ngadto sa kalibutan giisip nga gikinahanglan kaayo nga kon wala kini ang buhat sa mga ordinado sa daghang mga higayon dili epektibo (AA 10).

b.   Human sa Vaticano II, ang mga layko mibuhat na sa daghang mga buluhaton nga kaniadto iya ra sa mga cleric: ang pagka-lector, pagka-acolito, ug pagka-ministro sa Eyukaristiya. Sa mga dapit diin adunay kakulang o walay pari, gikinahanglan sa pipila ka mga layko nga sangunan sa gimbuhatong ministeryal alang sa katilingban. Gani, niabot sap unto nga dili na pod kaayo klaro ang linya tali sa binunyagan ug naordinahan, busa daghang mga pangutana ang mitumaw.

c.   Sa usa ka bahin, ang Konsilyo mipadayag nga iya sa mga layko ang mga kalihukan diha sa kalibutan (LG 31, 36), apan sa laing bahin gipaklaro sa Konsilyo nga ang mga pastor lamang ang adunay katungod sa paghukom sa katinuod ug sa angay nga paggamit sa mga gasa sa mga layko (AA 3). Kining kalibug nagpadayag sa padayong panagbingkil tali sa “katakus” sa mga layko ug “pag-aninaw” sa mga ordinado. Busa, padayon ang mga pamalandong mahitungod sa mga layko bisan human sa Vaticano II. Apan ang mga kalibog dili himoong babag sa mga paningkamot sa pagtambayayongay. (Ipadayon sa sunod isyu)