Ang atong panaw karon ngadto sa “Emmaus”

Ang usa sa nindot kaayo nga sugilanon sa Pagkabanhaw sa Ginoo nga gisaysay sa Ebanghelyo mao ang panaw sa duha ka mga  tinun-an ni Hesus nga mamauli na unta padulong sa dapit nga ginganlag “Emmaus.”  Sa tinuig natong kasaulogan sa panahon sa Pagkabanhaw sa Ginoo, gisangyaw sa ikatulong Dominggo sa Pagkabanhaw,  kining bahin sa Ebanghelyo sumala ni San Lukas 24:13-35.

Human nga gilansang sa krus ug namatay si Hesus, ug dayon gilubong, namauli na kining duha ka tinun-an nga dismayado, masulob- on ug puno’g kabug-at sa kapakyasan sa ilang mga gipangandoy ug gidamgo unta bahin kang Hesus. Apan, human mitungha ug mikuyog si Hesus uban kanila sa dalan; human sila matandog sa iyang gipanugilon bahin sa Kasulatan; human sila nagpikaspikas s a pan uban kaniya; nasinati nila ang pagkahibalik sa ilang kadasig ug kinabuhi. Ug tungod niining mabungahong panagtagbo, mibalik sila sa Herusalem ug misugilon sa ubang tunun-an sa ilang kasinatian. Alleluia!

Mao kadto ang panaw  padulong sa “Emmmaus”. Kini ang panaw sa mga nangaluya, dismayado ug nabug-atan nga mga, ingnon tang mga yano lamang mga tinun-an, kinsa buot na unta nga mangundang….. Apan, tungod sa bag-ong pakigtagbo sa Ginoo, napukaw sila, naulian ug nadasig sila pag-usab. Busa nahiuban sila pagusab niadtong mga madasigong ug malipayong nagsaksi sa pagkabanhaw sa Ginoo.

Bahin niining panaw sa pagkasaksi sa Ginoo, nahinumdum ko sa rito sa bunyag sa mga bata. Sa bag-o pa kong pari, nahinumdum ko nga magsugod ang rito sa bunyag sa gawas sa pultahan sa Simbahan. Human sa pasiunang bahin, pinangulohan sa ministrong Pari o Diakono, magprosisyon ang mga bunyaganan ug ang mga tagtungod ug sponsors ug mga nangapil, padulong sa sulod sa Simbahan sa dapit diin ilang paminawon ang Pulong sa Dios nga isangyaw. Sa pagtapos sa rito, magprosisyin na usab sila ngadto sa santuario alirong o atubang sa altar sa Santos nga Misa. Didto, maghiusa sila sa pagampo sa Amahan Namo, paminawon ang gihatag nga pahimangno ngadto sa ginikanan ug modawat sa gikinahanglang nilang panalangin sa Dios pinaagi sa Simbahan.

Ang katekesis bahin niining mga gagmayng prosisyon sa panahon sa bunyag, nagtudlo kanato nga ang Sakramento sa Bunyag dili lamang usa ka takna sa kinabuhi sa tawo, kon dili usa ka panaw sa pagtoo ngadto sa Ginoong Hesus nga namatay, gilubong, ug nabanhaw. Nagasugod ang maong panaw sa sa paghinulsol ug pagsalikway kang Satanas ug sa Sala, ug mobangon, mosaka, padulong sa nagkahamtong nga pagsalig, paghigugma ug paglaom sa Dios.

Ang maong panaw, sulod sa Simbahan, uban sa Simbahan, ug pinaagi sa Simbahan, kinsa mao ang Inahan ug Magtutudlo alang sa mga tinun-an.

Ug sama didto sa panaw sa Emmaus, ang rito sa Bunyag magtapos usab didto sa may altar ni Hesus sa Yukaristiya. ang Panaw sa pagtoo nga magsugod sa Bunyag magtapos didto sa pakighinagbo sa tinun-an kang Hesus sa Yukaristiya.

Karong panahona wala na ginahimo kining mga prosisyon, pag-alirong sa Altar  sa panahon sa Bunyag. Daw wala na matagai sa saktong nilang bili ang  kusog nga pagkatimaan niining mga bahin sa rito, mahitungod sa kahulugan sa Sakramento sa Bunyag. Daw nagmantinir na lang og minubo nga pagsaulog sa bunyag. Mao kaha ni ang hinungdan nganong daghan kaayong binunyagan, apan daghan kaayo kanila ang nagundang sa pagkatinun-an? Wala sila makapadayon nga moapil sa kinabuhi sa Simbahan, ilabi na sa pagsaulog sa Dominggo pinaagi sa Misa. Binunyagan, apan dili tinun-an o sumusunod ni Hesus.

Ang tinuig natong pagsaulog sa Pasko sa Pagkabanhaw maoy tinuig nga paagi sa Ginoo, pinaagi sa Simbahan,  nga mopakita ug motudlo, modasig pagusab sa iyang mga tinun-an, aron nga mopadayon ug magmalipayon sila sa panaw sa pagsaksi sa pagtoo sa Ginoo pinaagi sa pagkinabuhi nga Kristohanon gayud.

Kini untang sugilanon sa mga tinun-an sa Emmaus nga malipayong gisangyaw karong panahon, magpukaw ug magdasig untan sa mga ministro sa Bunyag nga iapil balik sa pagbunyag kining pagprosisyon ug pagtapos didto sa may altar sa Yukaristiya ug mohatag sa saktong Kateksesis niini.