Semana Santa

Niabot na kita sa tinuig nga kasaulogan sa Semana Santa. Sama sa gihapon dunay naglantaw niining panahon nga alang sa pagpahulay ug paglulinghayaw lamang. Apan salamàt sa Dios, ug sa paningkamot sa Simbahan,  duna gihapon nagahatag og spiritohanong pagtagad ug bili niining balaanong panahon. Atong balikon ug palawman pa ang atong pagsinati niining panahon. Dunay tulo ka kasaulogan nga makahuluganon ug mahinungdanon alang sa atong kalamboan sa Kristohanong panaw.

Ang Lukay sa Kadaugan. Sa pagsugod pa lamang niining semanaha, gisauolg nato ang Dominggo sa Lukay. Niining dominggoha, gisaulog nato ang madaugong pagsulod ni HesuKristo sa iyang Syudad – ang Herusalem,  diin siya nag-antos, namatay ug nabanhaw. Ang lukay alang kanila kaniadto ug alang kanato karon, timaan sa kalipay ug pagpaslamat sa kaluwasan nga naangkon pinaagi sa iyang pagsakripisyo sa kasakit, kamatayon, ug pagkabanhaw.

Sa atong panahon karon, taliwala sa daghang hagit ug hulga batok sa pagtoo ngadto sa Dios, kitang mga matuohon sa Simbahan nagasaksi ug nagapamàtuod, nga anaa ang kadaugan nato batok sa sala ug kadautan tungod ni Kristo, pinaagi kaniya ug uban kaniya kinsa una nang nagmadaugon. Busa, ang pagbitbit nato sa benditadong lukay ug pagpahimutang niini sa atong mga panimalay ug ubang kabtangan, nagapadayag sa atong pagambit sa maong kadaugan. Daygon nato si Hesus, ang atong bugtong manluluwas.

Pagbendita sa mga Lana sa kaluwasan ug ang mga Pari. Sulod sa Semana Santa, sa dili pa ang Triduo sa Pagkabanhaw, Martes ba, Mierkoles o Huwebes,  depende sa lugar, ang Misa sa Krisma saulogon sa Obispo uban sa mga Kaparian sa diyosesis. Sa ato pa, dako ni nga panagtigom sa tananag Pari uban sa Obispo ug sa mga Relihiyoso ug mga Laykong sakop sa Simbahan.

Ang tulo ka Lana nga gamiton sa sakramento sa Bunyag, Kompirma, Pagkapari nga gitawag “Krisma” solemneng panalanginan sa Obispo uban sa mga Pari. Unya, ang Lana usab nga gamiton alang sa sakramento sa Masakiton, solemne gihapon panalanaginan sa Obispo.Ug usab, himoon ang pagpanalangin sa Lana sa “Katekumen” kadtong nangandam alang sa Bunyag.

Kining mga lana karon ang ginagamit sa mga maluwasnong Sakramento sa pagpangalagad sa Simbahan. Ang mga magtotoo karon nagapadayg niining kasaulogan sa ilang padayong pagtoo ug pagsalig ug pagdawat sa kaluwasan nga gitanyag sa Dios pinaagi sa Simbahan. Busa, dakong higayon sa pagpalig-on sa pagtoo ang pagtambong ug pag-apil niining kasaulogan.

Niining misa usab, gitakda nga ang mga Pari, kinsa gitawag, gipili, gipadala alang sa ministriya sa kaluwasan, sama ni Kristo, magabag-o sa ilang gipanaaran sa adlaw sa ilang Ordinasyon. Kanilang mga Pari, nga nagapadayon nga matinud-anon sa mga panaad  sa pagsangyaw sa Maayong Balita, pagbalaan sa katawhan,  ug pagtagad sa panginahanglan sa katawhan, gipiyal ang mga Lana sa kaluwasan. Busa, pasalamatan nato ang Dios Amahan, Anak, ug Spirito Santo nga naghatag kanato sa pagpangalagad sa mga matinudanong mga Pari.

Triduo sa Pagkabanhaw. Magsugod kini sa Huwebes sa gabii, mopadayon sa Biyernes Santo, hangtod sa Sabado sa Bihilya sa Pagkabanhaw. Mao kini ang mga mahal nga adlaw. Mahal, tungod kay gipadayag ni Hesus ang iyang dakong pagmahal sa katawhan, nga bisan sa ilang sala gimahal gihapon sila. Mahal, tungod kay mahal kaayo ang gibayad alang niining gugmaha – Ang kasakit ug kamatayon ni Hesus, lawas ug dugo, ang tibuok niyang kinabuhi. Triduo kini, 3 in 1.

Ang pinakaimportanteng bahin sa Triduo mao ang pagahimoon nato sa Bihilya sa Pagkabanhaw. Ang tanang binunyagan sa tibuok Simbahan, niinning kasaulogan sa Pagkabanhaw, magabag-o sa atong panaad sa Bunyag. Isalikway ang sala, ug lig-onon pa ang pagtoo ug pagsalig sa Dios. Kining pagbag-o sa panaad sa Bunyag mahimo lamang makahuluganon kon sa tibuok Kwaresma, gidawat nato ang Pulong sa Dios nga nagtawag kanato nga bag-ohon ang pagtoo ug kinabuhi. Niining mga adlawa, ipabuhagay gikan  sa  kalawran sa Diosnong Kalooy, ang iyang nagsingapin nga mga Grasya. Ayaw ihikaw sa imong kaugalingon ug sa imong banay ang maong mga Grasya.

Hinaot unta nga makasinati kita og mas makahuluganong Semana Santa karong tuiga. Panalanginan unta kamong tanan sa Dios.