Sa ComVal: Basura himoong tabanog

COMPOSTELA VALLEY PROVINCE—–Bisan sa pagmugna ug kalingawan sa Summer gitinguha gihapon sa liderato sa probinsiya ang kahigayunan nga kini malambigit sa gihingusgang kampanya Kontra Solid Waste.

Gisulti mismo ni Senior Tourism Officer Christine Dompor nga himoong kabahin sa idalit nga mga dagkong kalingawan sa probinsiya panahon sa Summer ang Summer Kite Festival nga pagahimoon diha sa lungsod sa New Bataan karong Abril 29, ug nianang adlawa ang probinsiya pinaagi sa Provincial Tourism Office ilalom sa opisina ni Governor Arturo “Chiongkee” Uy magpasiugda sa Kite Flying Contest.

Ilalom sa temang “Basura Mo, Ipalupad Mo!” ang mga partisipante niini mogamit sa mga materyales nga bisan mopadulong na unta sa basurahan apan gitinguha pa gihapon nga kini subling mapahimuslan pinaagi sa paghimo niining usa ka tabanog aron nga sila malingaw.

Apan samtang ang pamilya puno sa gisaw-ang kalipay samtang nagsud-ong sa ilang tabanog nga daw langgam nga naglupad diha sa kahanginan, gipaneguro usab sa liderato sa probinsiya nga kini mamahimong usa sa mga labing mahinungdanong elemento diha sa gihingusgan niini nga kampanyang “Reduce, Reuse, and Recycle” sa mga basura ilalom sa malahutayong pag-implementar ni Gov. Uy sa Solid Waste Mangement Act sa Compostela Valley.  (gilbert m. cabahug, ids-comval)