Pagmalipayon Sa Pagsangyaw

Domingo Sa Pasko Sa Pagkabanhaw Sa Ginoo
Buhat 10:34, 37-43/ Ps. 118:1-2, 16-17, 22-23/ Col. 3:1-4/ Jn. 20:1-9

Malipayong Pasko sa Pagkabanhaw!

Niining pyesta sa tanang pyesta sa Simbahang Katoliko, angay natong bation ang kalipay sa pagsangyaw sa Ebanghelyo.

Dili ba diay kalipay nga sukad sa pagkabanhaw ni Kristo ang kanhing walay tingog nga mga kababayen-an sa kulturang Hudeyo karon nahimong unang magsasangyaw sa maayong balita sa kaluwasan? Si Maria Magdalena maoy nagrepresentar niining bag-ong kinabuhi sa pagdawat sa patas nga pagtagad sa tanang tawo. Ang kanhing  walay lugar sa katilingban karon maoy nahimong tinubdan sa impormasyon sa pagtuong Kristiyanismo. Ang pagkabanhaw ni Kristo maghimu unta kanato nga katawhan nga mobati sa patas nga pagtagad sa isigkatawo ug sa pagbati nga ang matag-usa gitawag sa pagkamagsasangyaw ngadto sa uban.

Dili ba diay kalipay nga ang kanhing nangahadlok nga mga tinun-an, karon mituo nga si Kristo nabanhaw? Ang kanhing nitalaw ug wala makasabot nga mga disipulo karon nakadawat sa gasa sa pagsalig nga si Kristo buhi diay. Sila ang instrumento ngano nga ang katawhan nakombinse sa pagtoo nga si Kristo mibuntog sa kamatayon.  Ang pagkabanhaw ni Kristo magdasig unta kanato sa pagbangon gikan sa atong kaluya sa pagsaksi ni Kristo nga nabanhaw. Mabati unta sa matag-usa ang kainit sa pagbuhat sa maayo taliwala sa hulga sa pagsalikway ug kamatayon kay ang kahayag sa bag-ong kinabuhi molambo gayod.

Sa mga pulong ni Santo Papa Francisco, ato untang mabati ang kalipay sa pagkaamgo nga gipangga kita sa Dios. Kining pagpangga nga magdasig kanato sa pagbuhat og maayo ug pagbiya sa atong sala. Kining pagpangga nga magdala kanato sa pagsunod kanunay sa atong konsensiya. Kining pagpangga nga magtukmod nato sa paghuna-huna sa kaayohan sa uban sama sa mga tinun-an nga mitaho sa maayong balita sa pagkabanhaw ngadto sa usa’g usa.