Organic food pwede makuha sa panimalay

Kini ang nasinati sa Father of Urban Container Gardening nga si Perfecto Rom human niyang gisugdan ang container gardening sa iyang kaugalingong panimalay—mas barato ug chemical-free nga mga gulay alang sa iyang pamilya.

Sa gipahitabong launching sa Davao Food Revolution niadtong March 22 sa Barangay Matina Crossing, gitudloan ni Rom ang mga inahan unsaon paghimo og kaugalingong container garden bisan gamay lang ang espasyo sa ilang mga panimalay. Si Rom usa ka agriculturist nga taga-Davao.

Sa pakighinabi sa DCHerald, giingon ni Rom nga kadaghanan sa mga katawhan mu-ingon nga wala silay ‘green thumb’ mao dili sila makapatubo og kaugalingong tanom. Apan giingon niya nga matun-an ra ang tamang paagi sa pagpananom ug kinahanglan sulayan nila kini maski usa lang ka paso o container sa pagtanom.

Giingon usab niya nga daghan ang benepisyo kung organic food ang ginakaon sa tawo. Siya mismo nagpamatuod sa iyang kasinatian diin nawala ang iyang mga balatian nga hinungdan kapila siya naadmit sa ospital human nga gisugdan niya ang pagkaon sa mga kaugalingong gitanom nga mga gulay.

Dugang usab niya nga dili kinahanglan mugasto og mahal aron makakaon ug organic nga mga gulay. Kinahanglan lang nga sulayan ug maghatag og igong panahon sa pagtuon sa pagtanom aron makita ang resulta.

Ang Davao Food Revolution gisugdan sa Mindanao Commission on Women (MCW) aron matabangan ang mga pamilya ilabi na ang mga inahan nga makakat-on unsaon pag-tanom og organic nga mga gulay sa ilang mga panimalay ug community gardens.

Tuyo usab niini nga makahibalo sila unsaong pag-andam og mga pagkaon nga barato ug healthy alang sa ilang mga anak.

Sumala sa Chair Emerita sa MCW Irene Santiago, ang mga anak ang mga asset o treasure sa ilang mga inahan mao kinahanglan healthy foods ang iandam alang kanila.

Gawas niana, tuyo usab sa Davao Food Revolution ang pag-undang sa pagpakaon og mga junk foods sa mga bata nga kasagaran barato pa kaysa sa mga healthy foods.

Gi-target usab sa maong programa ang mga school canteens aron mao ang mapalit sa mga bata nga anaa sa mga eskwelahan.