Mas Banha ang Kahilum

Domingo sa Pasyon sa Atong Ginoo/Domingo sa Lukay
Is. 50:4-7/ Ps. 22:8-9, 17-20, 23-24/ Phil. 2:6-11/ Mt. 26:14-27:66

Ang Dominggo sa Lukay (Palm Sunday) nagpahinumdum kanato sa higayon sa pagsulod ni Hesus sa Jerusalem diin siya didto nag-antus, gipaantos ug unya gilansang sa Krus.

Ang nisulod sa akong huna-huna mao kini: Taliwala sa kabanha sa mga tawo, milanog ang kahilum ni Hesus.

Balikan ta ang nahitabo. Sa pagsulod n Jesus sa Jerusalem, nagkaguliyang ang tibuok siyudad. Usa ka dakong panon  sa mga tawo mibuklad sa ilang mga sapot didto sa dalan samtang ang uban namutol ug mga sanga ug gikatag sa agianan. Ang mga tawo nga nag-una kang Hesus ingon man ang mga nagsunod kaniya naninggit, “Hosanna – dalaygon ang kaliwat ni David! Bulahan siya nga mianhi sa ngalan sa Ginoo. Dalaygon ang Dios! (Mt.21:6-9) Pipila ka adlaw nga nanglabay, mao gihapong grupo sa mga tawo misinggit pag-usab, “Ilansang siya sa Krus” (Mt. 27:22).

Sa duha ka panghitabo, ang mga tawo banha pero si Hesus nagpabilin sa kahilum.

Ang kahilum ni Jesus dili indikasyon sa kahadlok ug kahuyang. Diha sa iyang kahilum milanog ang iyang kaisog nga atubangon ang kamatayon aron pagtuman sa kabubut-on sa Amahan.

Ang Dominggo sa Lukay nagbutang ug tuno mahitungod sa tinuod nga kahulugan sa mga panghitabo sa mga sunod adlaw. Ang Semana Santa panahon sa kahilum dili kabanha. Kini dili “holiday” apan “holy day.”

Kita giimbitahan sa pagpaminaw sa mensahe ni Hesus pinaagi sa iyang pagpasakit, pagkamatay ug pagkabanhaw.

Ang mensahe dili madunggan diha sa kabanha. Madunggan lamang kini taliwala sa kahilum. Busa, nakaamgo ako nga mas banha ang kahilum.