Kabus nga DavOrnons nagtanom 500 kahoy

MATI City – Dugang 500 na usab ka mga semelyang kahoy nga acacia ang natanom didto sa Dumping Area sakop sa Barangay Matiao, dinhi nga ciudad, Abril 10, 2014.

Ang pagtanom gihimo sa sobra 900 ka pamilyang sakop sa Lumolupyong Kabus ug Timawa sa Matiao (LUKATIMA), Inc. didto sa luna nga ilang gitawag nga Lukatima Village nga ilang giplanohan nga himuon nga bag-ong Purok.

Leopoldo Dizon, presidente sa Lukatima nag-ingon nga ang pagtanom sa mao nga mga kahoy gihimo gumikan sa daku nilang pagsuporta sa espesyal nga programa ni Gobernador Corazon Malanyaon nga mao ang Million Trees Movement of Davao Oriental.

Dugang pa ni Dizon nga ang mga semelyang acacia nga ilang gitanom gikan sa Davao Oriental Provincial Nursery nga gihatag ni Gobernador Malanyaon ngadto kanila.

“Didto namo gitisok ang mga kahoy palibot sa basketball court, sa dakung dalan ug palibot sa kinatibuk-ang luna sakop sa Lukatima Village aron mohatag ug kabugnaw sa palibot ug sa pagpabugnaw sa dagat aron dili makamugna ug bagyo kay kini nga dapit daplin man sa dagat,” matud pa ni Dizon.

Sa niaging Abril 9, 2014, gisaulog sa mao nga dapit ang kapistahan ni Sr. San Vicente ug ang nag-Misa mao si Fr. Sayman.

Atol sa pag-wali ni Fr. Sayman, iyang giingon nga sukad niadtong tuig 1994, nagsige na siya ug taak sa mao nga dapit (dumping area) ug mang-lolho pa siya kaniadto sa iyang pantalon kay lawom pa ang dagat sa mao nga lugar ug maayo nalang kay nauga-uga na karon ug daghan na ang nanimuyo hangtod nakatukod ug kapelya.

Human gidayeg sa Pari ang maanindot nga kapelya, iyang gidasig  ang mga opisyales sa Gagmayng Kristohanong Katilingban (GKK) sa San Vicente Chapel aron matabangan ang taga Lukatma Village nga makatukod usab unya sa ilahang Kapelya.

Matud pa  ni Dizon nga daghan ang nagsinamok kanila kay daghan ang nag-interes ug nagpataka ug angkon sa mao nga luna nga dagat kaniadto, apan ang tanan walay ikapakita nga papeles isip kamatuoran, wala makatudlo asa ang utlanan o kaha mohon.

“Kaniadto, ang Lukatima gikasohan sa mga empleyado sa DENR kay kuno kini nga luna ilang himuon nga DENR Employees Village, apan ang kaso nga ilang gipasaka batok kanamo gi-dismiss sa Municipal Circuit Trial Court ug sa Regional Trial Court,“ dugang pa ni Dizon.

Human sa pagtanom sa mga kahoy, gipa-adto si Dizon sa isa ka inila nga abogado dayon gisaaran nga tabangan ug gitudloan sa mga lakang nga buhaton aron makagunit na og papeles ang mga sakop sa Lukatima timaan sa kahingpitan sa pagpanag-iya na nila sa mao nga luna.

Sa pagkakaron gumikan kay daghan ang gusto maka-angon ug lote nga balayan dinhi nga ciudad ilabina sa mga tawo gikan sa nabagyohan nga mga lungsod ilabina niadtong magpatungha sa ilang mga anak sa kolehiyo, mao nga daghan ang naglaraw nga magbalay sa luna nga kasikbit sa Lukatima Village paingon sa manggahan kay matud pa nila nga wala pa usab titulo ang yuta nga kilid sa manggahan tabok sa kanal gikan sa Lukatima Village. (Sarx Lanos/DNPRC)