Ipaambit Ang Kalipay Ug Panaghiusa

IKATULO NGA DOMINGO SA PASKO SA PAGKABANHAW
BUHAT 2:14, 22-28/ SAL. 16:1-2, 5, 7-8, 9-10/ 1 PED. 1:17-21/ LK 24: 13-35
Ni: Fr. Dioscoro Saniel

Kalipay ug panaghiusa, mga mensahe sa pagkabanhaw nga gipadayag diha sa atong Ebanghelyo karon. Ang duha ka tinun-an masulob-on nga naglakaw padulong sa Emmaus human sa nahitabo kang Hesus. Sila naglaum nga si Hesus maoy magdala kanila ug kagawasan apan napakyas ang ilang gila-uman tungod kay namatay man si Hesus. Samtang naglakaw sila nga puno sa kaguol ug kasakit, si Hesus ni-uban kanila. Human nila nasayri nga si Hesus diay kadtong nikuyog kanila, malipayon silang namalik sa Jerusalem.

Kalipay ang usa sa mensahe sa pagkabanhaw. Asa nagagikan kining maong kalipay? Una, diha sa pagkabanhaw ni Hesus iyang gituman ang saad nga kaluwasan. Dinhi atong makita nga ang Ginoo kanunay motuman sa iyang saad. Dili gyud diay kita pakyason sa Dyos. Ikaduha, ang nabanhaw nga Ginoo nakig-uban kanato diha sa atong panaw sa kinabuhi sama sa iyang pag-uban sa duha ka mga tinun-an nga masulob-on. Diha sa mga kasakitan ug kagul-anan sa kinabuhi, ang Dyos nakig-uban kanato. Busa angay natong huptan ang kalipay tungod kay dili kita pasagdan sa atong Ginoo.

Ang ikaduhang mensahe sa pagkabanhaw mao ang panaghiusa. Ang kamatayon ni Hesus nakapatibulaag sa iyang mga tinun-an. Apan ang iyang pagkabanhaw naghiusa kanila pag-usab. Human nahimamat sa duha ka tinun-an si Hesus nga nabanhaw, namalik sila sa Jerusalem aron pagbalita sa ilang nasaksihan ug dinhi nahiusa sila pag-usab sa napulog usa ka mga tinun-an. Ang kasubo tungod sa kamatayon ni Hesus nakapabahin-bahin sa iyang mga tinun-an. Apan ang kalipay tungod sa iyang pagkabanhaw nakapatigum ug nakapalig-on kanila pag-usab. Ang presensya sa nabanhaw nga Ginoo kanunay nagdala ug panaghiusa.

Ipadayon nato pagpa-ambit ang mga mensahe sa pagkabanhaw pinaagi sa paghatag ug kalipay ug kadasig sa atong isigkatawo. Ug ang pagpaningkamot nga magdala ug panaghiusa diha sa atong tagsa-tagsa ka pamilya ug katilingban. MALIPAYONG PAGKABANHAW!