GKK Pastoral Visit ginahimo sa Agdao

Aron mas mailhan sa Kura Paroko ang iyang mga parokyano ug mas mahibaw-an ang tinuod nga kahimtang sa mga Gagmay’ng Kristohanong Katilingban (GKK) kasamtangang ginahimo sa San Antonio de Padua Parish, Agdao ang GKK Pastoral Visit.

Sa pakighinabi sa DCHerald kang Fr. Leonie España, kura paroko sa Agdao, ginahimo niya ang pagbisita kaduha ka higayon matag semana sa 78 ka mga GKK nga sakop sa parokya.

Sumala niya, nagatapok ang mga lideres sama sa Pangulo sa Katilingban (PSK), Pangulo sa Liturhiya (PSL), Pangulo sa Alagad (PSA), Pangulo sa Batan-on (PSB), Pangulo sa Pagpanudlo (PSP) aron makapadayag sila sa kasamtangang kahimtang sa ilang tagsa-tagsa ka mga katilingban (GKK).

“Pinaagi niini mas nailhan nako kung kinsa ang mga laykong lideres ug mas mailhan usab ko nila isip ilang kura paroko nga nakig-uban sa ilang kahimtang,” giingon ni Fr. España.

Adunay usab pamilya nga mudawat sa kura paroko aron didto siya matulog inig ka-gabii. Ang panagtapok sa kura paroko ug mga laykong lideres kasagaran mahitabo sa hapon hangtud sa alas 10 sa gabii.

Gidugang usab sa kura paroko nga pinaagi sa GKK Pastoral Visit, nahibaw-an niya nga adunay mga kapilya nga ginahulat na lang ang demolition tungod kay walay titulo ang yuta nga gitukoran niini ug adunay laing nanag-iya sa maong luna.

Nasayran usab ni Fr. España nga adunay mga komunidad nga namuyo sa luna nga dili sila ang nanag-iya sa luna ug hapit na ma-demolish ang ilang mga panimalay.

Giingon ni Fr. España nga dako kining hagit alang kanila ilabi na nga posible silang mapahawa sa ilang panimalay. Dako usab kining hagit sa Simbahan nga nakig-uban kanila ug nag-porma sa ilang pagtoo.