GKK Norms and Policies gitutokan

Kasamtangang ginatan-aw sa mga kaparian ilabi na ang mga kura paroko sa Arkidyosis sa Dabaw ang mga balaod nga ginasunod sa pagpadagan sa Gagmay’ng Kristohanong Katilingban (GKK).

Ginahimo ang pagbasa sa resulta sa 2ND Archdiocesan Pastoral Assembly of Davao  (APAD II) nga gihimo sa lokal nga simbahan kaniadtong 1994 aron makita ang kasamtangang kahimtang sa GKK ug unsa ang mga maayong himoon aron mapalambo ang matag Kristohanong katilingban.

Niadtong Marso 31, gihimo ang meeting sa mga kura paroko sa Sacred Heart Vicariate sa Dabaw nga gilangkoban sa mga parokya sa San Francisco de Asis sa Tagakpan, Blessed John Paul II Parish sa Los Amigos, Most Sacred Heart of Jesus sa Calinan, Mary Help of Christians sa Dacudao, San Isidro Labrador sa Lumondao ug San Miguel sa Marahan. Sa Marahan gihimo ang usa ka adlaw nga meeting.

Kauban sa maong meeting sila si Fr. Pedro Lamata, GKK Coordinator, Vicky Anghag sa Pastoral Office ug si Auxiliary Bishop George Rimando, Pastoral Director. Sila ang nag-facilitate sa diskusyon sa matag items sa GKK Norms and Policies.

Pipila na usab ka meeting ang nahitabo sa ubang vicariate sa Dabaw.

Sa gipahigayon nga panagtapok, gibasa sa matag kura paroko ang unod sa booklet sa GKK Norms and Policies ug naghimo og mga recommendations basi sa mga panghitabo sa kasamtangan ug milabay’ng tuig ilabi na sa mga butang nga anaay kalabotan sa Sakramento, responsibilidad sa mga lideres sa GKK ug pagpadagan sa kinatibuk-ang komunidad.

Ang maong rekomendasyon ipasaka sa ipahigayong panagtapok karong Mayo 12-13 diin i-report sa vicar forane ang mga nahisgotan sa vicariate level. Ang panagtapok maoy sinugdanan sa posible nga himoong kausaban sa ginasunod nga GKK norms and policies dinhi sa Arkidiyosis sa Dabaw.