Diary of a PSL

“Isip usa ka Katoliko, atong masabtan nga ang mga parokyano, dili kaayo makahatag sa ilang kasingkasing ug huna-huna kay ang ilang rason lagi kay busy sila sa ilang trabaho.  Ang uban namo nga lideres nga nagadumala, adunay g’yuy paningkamut, at least 80-90%  ang among mahatag kay duna man tay mga pamilya. ” – Leonardo   

Leonardo Tizon

Pangulo sa Liturhiya (PSL),

San Jose GKK JLA Subdivision

St. Joseph the Worker Parish

Sasa, Davao City

Hiyee!  Sa padayon nga selebrasyon sa Tuig sa mga Layko, paminawon nato karon ang tingog sa usa sa atong mga pinalanggang mga PSLs.  Sa statistics niadtong 2013, adunay nakatala nga 3, 544 ka PSL gikan sa 37 ka mga parokya (1, 727 ka GKKs) dinhi sa Artsidiyosesis sa Dabaw.

Dear KNOT,

Dise otso (18) na ka tuig sukad nga misulod ko isip usa ka PSL.    Isip usa ka aktibo nga lider sa atong GKK, adunay higayon nga daghan ang muapil ug Kasaulogan sa Pulong (KSP), duna po’y higayon nga gamay lang.  Kasagaran man gud sa atong  kapanahonan karon, ilaha d’yung ipasibaw ang ilang pangatarungan nga ang trabaho maoy una sa ilaha.  Ikaduha ra nang nagapakita sa kaugalingon aron sa paglig-on sa atong Katolikong Pagtoo.

Sa ubang mga kabataan, ang panahon nila nakasentro na sa educational nga aspect kay ilaha g’yud gihatagan ug higayon ang panginahanglan sa eskwelahan.  Ang uban nahilig diha sa internet .  Magtambayayong unta ang mga batan-on ug mga hamtong.  Mahibaw-an unta nila nga kabahin sila sa kalambuan isip sumusunod ni Hesukristo.

Matag Katoliko, usbon unta ang ilahang relihiyosong aspeto sa kinabuhi.  Muhatag unta sila ug bulawanon nga higayon sa ilahang pang adlaw-adlaw nga kinabuhi dili lang sa pagsimba sa matag adlaw nga Domingo apan usab diha sa mga kalihukan sa GKK aron ang presensya ug ang pagsinabtanay anaa.  Sa panagbingkil, ipaubos ang atong kaugalingon kay kita makasasala man.  Tagaan nato ug higayon ang atong GKK nga mulambo, muani ug kaayuhan diha sa daghan nga pakig-uban sa mga pag-ampo sa kapilya. Salamat kaayo DC Herald!