Ang Kamahinungdanon sa Pito ka Sakramento!

Ikatulo ang Yukaristiya unsa man ang kamahinungdanon niini sa atong kaluwasan? Ang Yukaristiya mao ang tinubdan ug pinakataas sa Kristohanong kinabuhi, sanglit kini mao ang pagkaon sa atong kalag nga makahatag ug kinabuhing tunhay, kay ang Ginoong Hesukristo mismo maoy atong gidawat niini, ang iyang kinatibuk-ang persona, ang iyang pagka-Dios ug pagka-Tawo, ang iyang Lawas ug Dugo diha sa dagway sa Pan ug Bino(cf. Mateo 26: 26-28, Markos 14:22-24, 1 Cor. 11: 23-26 ug Juan 6: 50-56). Ang pan ug ang bino pinaagi sa pagkonsagrar niini sa atong kaparian diha sulod sa santos nga Misa diha-diha dayon mabalhin kini sa Lawas ug Dugo ni Kristo o Transubstantiation. Madawat nato ang tinuod nga presensya ni Kristo sa dihang modawat kita sa pagkalawat. Ang atong kalag mapakaon ug matabangan nga mapalambo ang atong espiritohanong kinabuhi ug magpuyo kita nga puno sa grasya ug kahimayaan. Gikinahanglan nga angay ug takus kita sa pagdawat niini(cf. 1 Cor. 11: 23-26).

Ang Ikaupat mao ang Kompisal. Unsa man ang kamahinungdanon niini sa atong kaluwasan? Ang Kompisal usa ka sakramento nga nagahatag kanato ug kapsayloan sa atong mga kasal-ana. Ang Ginoong Hesukristo naghatag ug kagahum niini ngadto sa iyang mga tinun-an sa pagpasaylo ug sala (cf. Juan 20:21-23). Kini gitawag usab nga sakramento sa pagpasaylo, paghinolsol, pag-uli ug pagbag-o sa atong kinabuhi ug pinaagi usab niini nga sakramento mapag-uli kita ngadto sa Dios. Tungod sa atong pagpahilayo kaniya pinaagi sa atong mga sala, makahatag kini ug tumang pagbasol ug makahinlo sa atong mga konsensya ( 2 Cor. 5:18).

Ang Ikalima mao ang Paghilog sa Masakiton o anointing of the sick. Unsa man ang kamahinungdanon niini sa kaluwasan? Ang Hilog sa Masakiton kabahin usab sa sakramento nga makahatag kaayohan dili lang sa kalag kondili alang usab sa atong lawas ilabi na sa mga pisikal tang mga balatian, ug makadawat usab kita ug espesyal nga grasya niini ug mapahiusa kita ngadto sa mga kasakitan nga giantos ni Kristo (cf. Santiago 5:15-16), kini usab makahatag kanato sa paghinlo sa espirithanon tang kalapasan  gawas nga makahatg kini ug kaayohan sa mga balatian sa atong lawas.