GKK’s isip usa ka Panglantaw (Vision)

Sa unang sinulat (pasiuna) gisaysay nako ang hamubo apan batakang kahulugan sa Simbahan, ilabina sa pagsabot niini basi sa Dokumento sa Baticano II.

Sa niaging mga siglo, ang Simbahan local o dyosesis gisiak-siak sa nagkadaiyang Katilingban sa patoo nga gitawag Parokya. Usa ka teritoryo nga gilangkuban sa mga tumutoo ubos sa pagdumala sa Kura Paroko isip kaabag sa Obispo. Apan sa dagan sa kapanahonan, midako ug midaghan ang katawhan nga sakop sa parokya. Ang pagpadayag sa pagtoo na sentro diha kasagaran sa mga sakramento nga maayo man unta apan, dili malangkuban sa laing aspeto sa kinabuhi ug pagtoo.

Dihang nagpahitabo ug Baticano II (1962-65) gihatagan ug kabag-ohan ug pagsabot sa Simbahan isip Katilingban! Katilingban sa mga disipulo ni Kristo diin adunay pakigsuod, pagbinayloay, pagtinabangay, ilabi na ang aktibong partisipasyon sa mga sakop. Kining maong panglantaw mapahitabo lamang kung adunay pundok o katilingban nga igo-igo sa sakop aron adunay personal ug katilingbanong pagpuyo sa usag-usa isip sumusunod ni Kristo.

Naamguhanb nga ang maong panglantaw mahitabo lamang kung nay gitawag nga Gagmay’ng Kristohanong Katilingban o GKK! Nakita nga posibli kini sama sa nahitabo sa unang mga Kristiyano nga gisaysay sa Buhat sa mga Apostoles (Acts of the Apostles) Kapitulo 2:42-47 ug Kapitulo  4:32-37.

Ang pagpahitabo sa Baticano II maoy dakong grasya sa Dios alang sa makanunayong pagbag-o ug paglambo sa Simbahan diha sa kalibutan. Busa, sukad niadtong 1960’s hangtud karon, daghang mga dyosesis sa kalibutan, ilabina sa Latin America, Africa ug Asya nagtukod ug mga GKKs. Sa Asya, daghang mga nasud nagsugod ug nagpadayon niini pagtukod ug pagsustinar sa ilang GKKs.

Sa Simbahan sa Pilipinas, ang GKKs nasinati gayud isip usa ka panglantaw. Tuki-on kini sa ikatulo nga GKK-series sa Davao Catholic Herald.