Fatima Parish gipakusgan ang pagpasabot bahin sa pagtoo

Aron mas masabtan sa katawhan ang pagtulon-an sa Simbahan mahitungod sa Katolikong pagtoo, gipakusgan sa Our Lady of Fatima Parish ang katekesis ngadto sa mga Gagmay’ng Kristohanong Katilingban (GKK).

Sa pakighinabi sa DCHerald sa kura paroko nga si Fr. Henry Campeon, kini mao ang duso sa parokya karong panahona ilabi karong Kwaresma.

Dugang pa niya nga kini ginahimo matag bulan sa nagkalain-laing GKK diin ginahimo ang Misa ug ginasundan kini sa pagpaambit mahitungod sa 12 Articles of Faith. Kahinumduman nga bag-o lang natapos ang pagsaulog sa Simbahan sa Tuig sa Pagtoo ug ginapadayon ang pagpasabot sa Katolikong Pagtoo aron kini mapuy-an pa nga mas makahuluganon.

Giingon usab ni Fr. Campeon nga tungod sa mga kalihukan sama niini sa matag kapilya, ma-awhag ang tanan nga magtinabangay ilabi na sa pagpangandam sa kapilya ug uban pang buluhaton sa matag komunidad.

Gihinaut usab nga mapadayonon ang pagpasabot sa katawhan mahitungod sa Katolikong pagtoo aron mas mapalawom nila ang ilang kinabuhing Kristiyano.