Ang Pagkab-ot sa Hingpit nga Kaluwasan

Kini mao ang mga GIYA O ANG-ANG aron sa pagkab-ot sa kaluwasan nga gitanyag sa Dios kanatong tanan. Una mao ang pagbaton ug BUHING PAGTUO- Kini mao ang pinaka-una ug importanting bahin aron makab-ot ang kaluwasan. Si Kristo miingon “Ang motuo ug magpabunyag maluwas, apan ang dili motuo silotan” Marcos 16:16. “Faith is necessary for salvation.. Faith is a foretaste of the knowledge that will make us blessed in the life to come” (CCC p. 57 par. 183-84). Busa ang pagtuo kinahanglan gayud atong huptan ug lig-onon sa kanunay.

Ikaduha mao ang MAAYONG BINUHATAN- kawang ug dili lig-on ang pagtuo kon dili kini apilan ug maayong binuhatan. Ang kasulatan nagapasidaan “unsay kapuslanan kon ang usa ka Tawo moingon nga siya may pagtuo, apan walay mga maayong buhat? Makaluwas ba kaniya ang Pagtuo? Dili gayud” Santiago 2:14. Kay angay natong hinomdoman nga patay ang pagtuo kon walay buhat (cf. San. 2:17). Busa importante usab nga kita adunay mga maayong binuhatan nga batonan uban sa lig-on tang pagtuo. “Kay gantihan sa Dios ang tagsa-tagsa sumala sa iyang binuhatan” Roma 2:6.

Ikatulo mao ang PAGHINOLSOL UG PAGKUMPISAL SA ATONG MGA KASAL-ANAN – Tungod sa gugma sa Dios kanato andam gihapon siyang mopasaylo ug modawat sa tawo nga maghinolsol, magbasol ug mokumpisal sa iyang mga sala, kay dili buot sa Dios nga mahimulag kita kaniya ug kita mamaluwas. Ang sala maoy mopalayo nato sa grasya sa Dios ug makapahimuwag sa atong relasyon nganha kaniya.  “Sin is an utterance, a deed, or a desire contrary to the eternal law… It is an offense against God” (CCC p 512 par. 1871). Busa para kita mamaluwas ato gayud hinolsolan ug ikumpisal ang atong mga kasal-anan, ug ato kining isugid ngadto sa iyang mga tinugyanan nga mao ang iyang kaparian. (cf. Eccl. 5:6, Juan 20:21-23 ug Santiago 5:13-16).

Ikaupat mao ang PAGPASAKOP SA MATUOD NGA SIMBAHAN- sayud kita nga si Ginoong Hesukristo nagtukod ug usa ka Simbahan o Iglesia dinhi sa kalibutan(cf. Mateo 16:18), ug kining Simbahan siya gayud ang ulo nga mao ang iyang lawas (cf. Colosas 1:18), nga mao ang iyang katawhan nga mao ang iyang pagaluwason (cf. Edeso 5:23). Busa angay gayud kitang magpasakop niini aron sa pagtuman sa kabobot-on sa iyang Amahan(cf. Mateo 7:21 ug Juan 6:40). Kay ang Simbahan mao ang haligi ug sukaranan sa tanang kamatuoran (cf. 1 Tim. 3:15). “The Church in this world is the Sacrament of salvation, the sign and the instrument of the communion of God and men” (CCCp.225 par. 780). Busa importante usab nga kita magpasakop sa Simbahan ni Kristo kay dinhi nato makaplagan ang kamatuoran, ang grasya ug ang kaluwasan. Ug kining Simbahana mao ang simbahang Katoliko. “Catholic Church is a divine society founded by JesusChrist” (Groiler Encyclopedia vol. 5 p. 106).

Ikalima mao ang PAG-AMPO, PAGTAMBONG SA MISA UG PAGDAWAT UG YUKARISTIYA- kini mao ang mopalalom sa atong relasyon ngadto sa Dios, mopalambo sa atong espiritohanong kinabuhi aron sa hingpit madawat nato ang kaluwasan. Kay ang pag-ampo ato kining tulumanon ug responsibilidad. (cf. Mateo 26:41, 7:7 ug 1 Tes. 5:17). Ang pagtambong ug Misa mao ang pag-angkon nato sa tinubdan sa grasya, kay ang Misa mao ang pinakataas nga pag-ampo ngadto sa Dios, ang Misa mao ang dili madugoon nga sakripisyo sa kalbaryo sa krus o unbloody sacrifice diin gihalad ang iyang Lawas ug Dugo para kalan-on natong tanan. “Eucharist  the sacrament of salvation accomplished by Christ on the Cross… a sacrifice of thanksgiving… a sacrifice of praise. (CCC p. 381 par. 1359-61). Ug ang pagdawat sa Lawas ug Dugo ni Kristo siya miingon “Ako ang Pan nga gikan sa langit ang mokaon niining Pan dili gayud mamatay. Ug ang Pan nga akong ihatag mao ang akong unod aron mabuhi ang kalibutan… Ako ang Pan nga naghatag ug kinabuhi” (Juan 6: 48-51). Usa ka saad sa atong Ginoo nga kinahanglan natong sundon.

Ikaunom mao ang PAGSUNOD SA BALAOD SA DIOS UG SA IYANG SIMBAHAN- Si Kristo miingon “Ang modawat sa akong mga sugo ug magtuman niini maoy nahigugma kanako” (Juan 14:17). “Busa ang dili magtuman bisan sa gamay niining kasugoan…mahimong labing iwit sa Gingharian sa Langit… Apan ang magtuman sa balaod … mahimong dako sa gingharian sa Langit” (Mateo 5:19). Maingon usab atong sundon ang balaod nga iya sa Simbahan ni Kristo, diin kini iyang gihatagan usab ug katungod sa pagdumala sa iyang katawhan (cf. Mateo 16:18-19, 18:18). “Disobedience to the Church is disobedience to God”.

Ug ang Ikapito mao ang PAGMALAHUTAYON  o Perseverance- kon ugaling naa man nimo ang tanan, apan pag-abot sa mga pagsuway wala ikaw kalahutay mamahimong kawang lamang ang tanan. Si Kristo miingon “apan maluwas ang magpadayon hangtud sa katapusan” Mateo 10:22, 24:13). Busa importante gayud nga huptan nato ang birtud sa pagkamalahutayon luyo sa mga pagsulay, kalisud ug pag-antos nga atong masagubang sa matag-adlaw sa atong kinabuhi. Mga kaigsoonan kini mao ang pipila nato ka mga giya aron makab-ot nato ang gipangandoy natong tanan ang PAGKAB-OT SA HINGPIT NGA KALUWASAN.