Ang Pagkab-ot sa Hingpit nga Kaluwasan

“Padayon kamo pagpaningkamot uban sa kahadlok ug pagtahud aron paghingpit sa inyong kaluwasan.”

Kini mao ang mga pulong ni San Pablo paghagit sa mga magtotoo nga unta sa atong kinabuhi kanunay kitang maningkamot aron makab-ot nato sa hingpit ang atong kaluwasan. Mao kini ang pangandoy natong tanan. Kita naningkamnot sa atong kinabuhi dinhi sa kalibutan, pinaagi sa pagkinabuhi nga matarong tungod sa pagtoo nga human niining kinabuhia aduna pay kinabuhi ang bag-o natong latason o “life after death”, luyo niining luhaan nga kalibutan.

Ang kinabuhi gasa sa Dios, busa ato kining galamon subay gayud sa kabobot-on sa Dios nga atong Amahan. Si Hesukristo nga atong Ginoo uban sa iyang mga tinun-an kanunay nagapahimangno kanato: “Busa pagtukaw kamo kay wala kamo mahibalo sa adlaw o takna” (Mateo 25:13). Kay sa kaulahian kita ang magbutang sa kaugalingon tang sangpotanan tungod sa kagawasan nga gihatag sa Dios kanato. Kita ang magpili sa atong adtoan.

Sumala pang San Pablo: “kay gantihan sa Dios ang tagsa-tagsa sumala sa iyang binuhatan… May mga Tawo nagpadayon pagbuhat ug maayo…hatagan sila sa Dios ug kinabuhing dayon … Apan ipahamtang sa Dios ang iyang kasuko ug kapungot sa mga tawo nga naghuna-huna sa ilang kaugalingon ug NAGSALIKWAY SA KAMATUORAN aron sa pagbuhat ug dautan”. Roma 2:6-8. Sayud kita nga dunay duha lamang ka lugar nga atong adtoan kon kita mamatay na niining kalibutana, duha ka lugar nga adunay duha ka kahimtang nga molungtad hangtud sa kahangturan. Kay kon kita mamatay hukman kita sa Dios (cf. Heb. 9:27), ug kon ang Dios mohukom kanato subay gayud sa atong mga binuhatan, maayo o dautan (cf. 2 Cor. 5:10).

Adunay Langit alang sa mga matarong ug naningkamot sa pagtuki ug pagdawat sa kamatuoran. Kini usa ka kalipay nga mulongtad hangtud sa kahangturan. Adunay Impyerno alang sa mga tawong nagasalikway sa kamatuoran ug nagapadayon sa pagbuhat ug dautan. Kini nga kasakit mulongtad usab hangtud sa kahangturan.

Aron makaba-ot nato ang hingpit nga kaluwasan nga maoy gipangandoy sa Dios kanato, kinahanglan gayud nga kita manlimbasog niining kinabuhia sa pagdawat sa kamatuoran aron makab-ot nato ang tinguha nga kita maluwas.