Ang Kamahinungdanon sa Pito ka Sakramento!

Gimbut-an sa Dios nga ang iyang katawhan makabaton gayud ug kaluwasan (cf. 1 Tim. 2:4), busa mga kaigsoonan tungod sa iyang gugma dinhi kanato iyang gitanyag ang tanan nga mga pamaagi aron kita maluwas. Gawas nga iyang gihalad ang iyang kaugalingon nganha sa kamatayon sa Krus (cf. Juan 3:16), iya usab gitukod ang Simbahan aron maoy atong giya aron matagamtaman nato ang kamatuoran nga iyang gitudlo ug pinaagi sa maong Simbahan madawat nato ang grasya pinaagi sa atong kinasing-kasing nga pagbuhat sa mga tulomanon subay sa sugo ug sa gidisenyo sa Dios niini (cf. Mateo 16:18-19, Col. 1:18, 1 Tim. 3:15, Efeso 5:23-25).

Usa sa pinaka-sentro nga madawat nato diha sa iyang Simbahan mao ang pito ka SAKRAMENTO diin ang Ginoong Hesukristo mismo ang nagtukod niini alang sa kaayohan nato ug madawat nato ang grasya sa Dios nga maoy mohatud kanato sa pagka-balaan aron madawat nato ang kinabuhing walay katapusan nga maoy gusto sa Dios alang kanato. Unsa man ang Sakramento?

Sumala pa sa gihatag nga kahulogan kanato sa Simbahan: Sacraments are outward signs of inward grace, instituted by Christ for our sanctification (Catechismus concil. Trident., n. 4, ex St. Augustine, “De Catechizandis rudibus”). Ang Sakramento usa ka makitang timaan nga makahatag grasya, nga gitukod ni Ginoong Hesukristo.

Ang pulong sakramento gikan sa latin nga sacramentum ug sa griyego nga mysterion nga bout pasabot nga usa ka misteryo, diin kini nagahatag sa matag-usa ug grasya. Busa ang sakramento importante gayud alang sa atong kaluwasan sanglit ania man diri nato makuha ang tanan nga mga gasa sa pagka-balaan aron kita magkinabuhi subay sa kabobot-on sa Diosa. Adunay kitay pito ka Sakramento nga hingpit nga giya aron kita mabuhi sa grasya sa Dios kon ato kining madawat sa kinasingkasing gayud uban sa paghatag ug pagtahud niini ug pagpuyo subay sa sugo sa Dios.

Ang pito ka sakramento mao ang Bunyag, Kompirma, Yukaristiya, Kompisal, Hilog sa Masakiton, Pagka-Pari ug Kaminyoon, Kining pito mao makahatag ug kinabuhing makasantos sanglit si Ginoong Hesukristo maoy nagtukod niini para sa atong sakto nga pagkinabuhi diha sa iyang Simbahan.

Una ang Bunyag unsa man ang kamahinungdanon niini sa atong kaluwasan? Ang Bunyagh mao ang  unang ang-ang sa atong Kristohanong kinabuhi, diin kita gipakatawo sa espiritu ug sa tubig, Busa gikinahanglan kini sa atong kaluwasan (Juan 3:5 ug Markos 16:16), ug gihatagan kita niini ug permaenti nga timaan. Kung kini atong madawat mamahimo kitang sinagop nga anak sa Dios, makapanonod sa iyang gingharian, kabahin sa iyang lawas nga mao ang Simbahan, makuha ang atong salang panolondon (cf. Roma 5:12), ug madawat nato ang grasyang makasantos.

Ikaduha ang Kompirma. Unsa man ang kamahinungdanon niini sa atong kaluwasan? Ang Kompirma mao ang sakramento sa Espiritu Santo diin maoy mohatag pagpalig-on nato isip usa ka Kristiyano ug sumusunod ni Kristo. Sama sa mga Apostoles sa dihang mikunsad na kanila ang Espiritu Santo nahimo silang lig-on isip sumusunod ni Kristo ug nahimo silang matuod nga saksi sa Dios ug nawala ang ilang kahadlok sa pagmantala sa Pulong Sa Dios (cf. Juan 7:37-39, 16:7, Buhat 1:8, 2:1-4).

Kinahanglan gayud nga madawat usab nato ang Espiritu Santo diha sa Kompirma sanglit isip binunyagan mamahimo usab kitang buhing saksi sa Dios ug may katungod usab kita sa pagmantala sa pulong sa Dios ngadto sa uban aron magmaisog kita sa pagsangyaw niini isip sundalo sa Dios.