Ang Kamahinungdanon sa Kasaulogan sa Kwaresma!

(Part 2 of 2)

Usa gayud ka maayong hiyas isip Kristiyanos nga atong pugngan kon mahimo atong wagtangon ang mga nagkadaiyang bisyo o vices nga walay hinungdan nga makadaut hinoon sa atong lawas sama sa bisyo sa pagpanigarilyo, sobrang pag-inom, sobrang pagkaon, sobrang paglingaw-lingaw (Shopping, tan-aw ug sine, pag-adto sa mga beer house ug uban pa! (cf. 1 Corinto 6:9-10), kay karon nga panahona mas palabihon nato ang pagbuhat ug mga maayo nga iya sa Dios ug mga Diosnon nga lihok sama sa pagsimba ug pag-ampo, paghatag ug panahon sa pagbasa ug Bibliya ug uban pang mga relihiyosong mga sinulat, pagduaw sa mga masakiton, binilanggo ug paghatag ug tabang sa mga kabus ug mga nanginahanglan ug uban pang mga maayong buhat (Mateo 25). Kini mao ang tinuod nga hiyas ug birtud sa pagka-kristiyanos nga atong ipalabaw karon nga panahon, ilabi na nga grabe na ang kadaut nga nahatud sa atong katilingban karon tungod sa binuhatan sa pipila nga dili maayo ug wala na mahisubay sa lagda sa Dios ug labaw sa tanan sa atong pagka-makasasala.

Human sa kwarenta ka adlaw nga atong pagbuhat niini atong pagahandumon ang dakong lihok sa Dios, ang iyang pagpadayag sa iyang gugma kanato diin pinaagi sa pag-antos ug kamatayon nganha sa Krus natagamtaman nato ang kinabuhing tunhay. Tungod sa maong gugma giangkon sa Dios ang kasakitan aron kita mapasaylo sa atong mga sala (Juan 3:16, Heb. 10:9). Hinomdomi nga atong sala ug dili iyang sala ang iyang giantos, busa panahon nato nga ibalik lantaw kung angay ug takos ba kita karon nganha sa iyang atubangan.

Busa angay natong panghimug-atan nining kwaresma ipalabaw nato ang tulo ka mahinungdanong butang nga atong pagabuhaton mao ang Pagka-matinabangon o almsgiving diin sa kanunay motabang kita sa mga kabus ug nanginahanglan sa kinasing-kasing gayud. Pag-ampo o prayer diin pamalandongan nato kung unsa na ang atong relasyon sa Dios sa isigkatawo ug sa atong pamilya. Pagpuasa o fasting diin kini usa ka pamaagi nga atong gihalad sa Dios ang atong kaugalingon pinaagi sa pagpugong dili lang sa pagkaon kon dili sa mga unodnon ug kalibutanhong lihok nga walay hinungdan ug makadaut lamang sa atong lawas.

Busa buhaton nato kini sa kinasing-kasing gayud ug uban sa hugot nga pagtuo nga sa kaulahian ang Dios maoy bugtong tang adtoan diin mao kini ang pinaka-uyokan sa tanan. Higugmaon nato ang Dios ug ang bunga niini aduna kitay gugma sa atong silingan ug labaw sa tanan mapuy-an ug mahimong malamboon ang kaugalingon tang PAMILYA diin maoy sentro ug sumbanan sa pagbag-o usab sa atong komunidad. Sama sa gipangutana kang Mother Teresa sa dihang gihatagan siya ug pasidungog nga Nobel Peace Prize “What can we do to promote peace?” Siya mitubag, “Go home and love your family.”