Ang Kamahinungdanon sa Kasaulogan sa Kwaresma!

“Unya gidala si Jesus sa Espiritu ngadto sa kamingawan aron tintalon sa yawa. Nagpuasa siya sulod sa kap-atan ka adlaw ug kap-atan ka gabii ug unya gigutom siya”. Mateo 4:1-2.

Kitang mga Kristohanon nagasaulog na usab niining dakong selebrasyon sa atong Simbahan ug kabahin sa Liturhiyanhong siklo nga mao ang  KWARESMA o LENT, diin kini tinuig natong ginasaulog. Usa sa mahinungdanong unod niini nga kasaulogan mao ang PAGPANGANDAM SA ATONG KAUGALINGON pinaagi sa pag-ampo, pag-puasa, pag-pugong, pag-hinulsol  ug  pagbuhat sa kalooy ngadto sa isigkatawo (spiritual and corporal works of mercy). Kay usa sa dakong tumong niini nga selebrasyon mao ang paghandom ug pag-pangandam nato sa pagsaulog sa pag-antos, kamatayon ug pagka-banhaw sa atong Ginoong Jesukristo. Kini nga kasaulogan inubanan sa panghinaut nga ato kining saulogon sa kinasing-kasing ug tinud-anay gayud, kay kini mao ang panahon diin atong lantawon nganhi sa atong kinabuhi ang atong  pagserbisyo ngadto kaniya alang sa nagkadaiyang pamilya ug komunidad.

Unsa man ang bout pasabot sa kwaresma ug asa kini nagsugod? Kining kwaresma nagsugod kini sa una pa gayong kapanahonan sa una pang mga Kristohanon. Ang Pulong kwaresma o lent gikan sa latin nga termino nga quadragesima (French carême, Italian quaresima, Spanish cuaresma), nagpasabot ug kwarenta ka adlaw o 40 day’s sa pag-pugong (fasting), ug pag-ampo, (newadvent.com//catholic encyclopedia). Kini nga kwarenta ka adlaw sa paghinulsol, pag-pugong ug pag-ampo  nag-gikan kini diha sa Balaang Kasulatan diin isip Kristiyano ato kining gisunod. Sama kang Moises nga siya nagpabilin pagpuyo sulod sa kwarenta ka adlaw didto sa Bukid sa Sinai uban sa Dios (Exodus 24:18), ang kwarenta ka-adlaw ug kwarenta ka gabii nga si Propeta Elias nagapadayon sa paglakaw ngadto sa Bukid sa Horeb (1 Hari 19:8), ug ang pagpaulan sa Dios sulod sa kwarenta ka-adlaw ug kwarenta ka gabii sa panahon ni Noa sa dakong lunop sa kalibutan (Genesis 7:4), ug ang mga katawhan naglawig sulod sa kwarenta ka tuig padulong sa yutang sinaad o promised land (Numeros 14:33), ug si Propeta Jonas sa iyang pagpanagna nga ang siyudad sa Ninibe pagahukman kung dili magbasol sulod sa kwarenta ka adlaw (Jonas 3:4).

Bisan sa Bag-ong Tugon ang atong Ginoong Jesukristo nagpuasa didto sa kamingawan sulod sa kwarenta ka-adlaw, diin siya usab gitintal sa yawa (cf. Matthew 4:1-2, Mark 1:12-13, Luke 4:1-2). Diin si Jesus midaug batok sa tulo ka higayon sa pagsulay kaniya, diin iyang gigamit ang kasulatan aron nga ang yawa mabuntog ug mabugaw niya palayo. Busa klaro ug dayag kaayo nga kining pagsaulog nato sa kwaresma o lent napanunod nato sa una pang kapanahonan sa katawhan sa Dios ug bisan gani ang atong Ginoong Jesukristo mismo mibuhat niini nga kasaulogan sa pagpugong ug pag-ampo sulod sa kwarenta ka-adlaw.

Mao nga isip Kristiyanos ato usab kining gisunod, diin niining panahona usab atong gipangandaman ang atong kaugalingon sa pagsaulog nato sa paghandom sa pag-antos, kamatayon ug pagka-banhaw sa atong Ginoo pinaagi sa pagsusi usab sa atong kaugalingon. Sa ato usab nga pagpugong sa kaugalingon pinaagi sa pagpuasa dili lamang sa pagkaon kondili pagpuasa usab sa mga unodnon ug materyal natong mga kailibgon nga kon mahimo ato na kining biyaan sa hinay-hinay ug maingon man usab sa paghatag ug panahon sa paghinulsol sa atong mga kasal-anan uban sa paghatag ug taas nga panahon sa pag-ampo ug pagdebosyon sulod niining kwarenta ka adlaw nga kasaulogan sa kwaresma, kay kini tradisyon na nga atong nasunod. Kini subay gayud sa atong Gugma sa Dios. Dili kini usa ka simpleng relihiyosong buhat lamang kondili ibutang sa kasing-kasing ug pagapuy-an dili lang sulod sa kwarenta ka-adlaw kondili sa matag lakaw sa atong kinabuhi. Kini usab nga panahon, adlaw sa pag-usab sa atong kaugalingon.