Ang Dignidad ug Misyon sa Mga Layko “Ganito Noon; Paano Ngayon?”

(Ikatulong Bahin/Giandam ni Fr. Ronald Lunas)

2. Naunsa pagka-tagik ang pulong “layko”?

a. Diha sa Simbahan, ang Katawhan sa Dios sa bag-ong kasabutan, bisan sa sinugdanan, aduna nay mga nailhang mga pangulo. Anaa ang mga presbyteroi, episcopoi, ug mga diakonoi.  Ang mga presbyteroi (presbyteros kon usa ra; nagpasabot : pangulo) mao ang nagdala sa matag katilingbang Kristohanon. Ang mga episcopoi mao ang nagdumala (episcopus kon usa ra; nagpasabot: tagdumala o supervisor) sa kahugpungan sa mga katilingbang Kristohanon. Sa sinugdanan, usa ka hugpong sa mga presbyteroi ang gisangunan sa gimbuhaton sa pagka-episcopoi; apan sa ngadtongadto, usa na lang ka episcopus ga gipili gikan sa mga presbyteroi aron magdumala sa usa ka hugpong sa mga katilingban inabagan sa mga presbyteroi ug diakonoi. Ang mga diakonoi (diakonos kon usa ra; nagpasabot: katabang) mao ang katabang sa mga episcopoi ug sa ngadtongadto sa mga presbyteroi.

b. Apan ang mga pangulo ra ang aduna nay pangalan: episcopoi, presbyteroi, ug diakonoi. Walay pangalan ang mas dakong bahin sa Katawhan sa Dios. Si San Clemente sa Roma, sa unang siglo, sa iyang Sulat ngadto sa mga Taga-Korinto (40:6) mitagik sa pulong laikos (laikoi, kon daghan na) alang kanila. Gikan kini sa pulong laos. Busa ang pulong laikos nagpasabot gihapon ug adunay kalambigitan sa Katawhan sa Dios nga gipili ug gihatagan ug misyon. (Ipadayon sa sunod isyu)