Mga Patuo-tuo o Superstitious Belief

“Ako ang Ginoo nga inyong Dios… Ayaw pagbaton ug laing dios gawas kanako “, Exodus 20:2-3. Kini mao ang unang sugo sa Dios nga iyang gihatag kang Moises aron maoy sundon sa iyang katawhan. Kini nga kasugoan gihatag kanato aron ang Dios nga labaw sa tanan mao ray atong tohuan, alagaran ug simbahon wala nay lain pa gawas kaniya lamang.

Isip usa ka Kristohanong Katoliko angay gayud nato kining sundon ug tumanon. Ug subay sa tudlo sa Simbahan kita nagatuo, naga-alagad ug nagasimba sa USA KA MATUOD NGA DIOS LAMANG. “Now this is the Catholic Faith : We Worship one God in the Trinity and the Trinity in unity… the Godhead of the Father, Son and Holy Spirit is one their glory equal, their majesty coeternal”. (cf. CCC p. 80, par. 266, Mateo 28:19-20, 2 Cor. 13:13). Busa  walay tudlo ang Simbahang Katoliko nga supak sa maong unang kasugoan sa Dios.

Kitang mga Katoliko wala nakasupak niini nga kasugoan tungod sa pagtamod nato ug mga larawan ug imahen, paghatag ug debosyon kang Birheng Maria ug sa mga Santos sa Langit. Angay natong hinomdoman nga walay doktrina sa Simbahan nga nagtudlo sa pagsimba ug larawan o pagsimba ug mga Santos. Ang unang sugo sa Dios wala magdili sa paghatag nato ug pagtahud sa mga Balaan o Santos sa langit ug mga balaang butang o imahen, gawas nga wala nato kini gipasidunggan  nga sama sa Dios nga pagpasidungog.

Ang debosyon kang Maria ug sa mga Santos wala kini mahisupak sa unang sugo, ug walay but-ang Katoliko nga nagabuhat niini, ug ang pagtamod ug mga larawan o imahen sa mga Balaan gitugutan kini diha sa Balaang Kasulatan mabasa kini diha sa Exodus 25:17-20, 2 Cronicas 3:1-10 ug Ezequiel 41: 17-20. Ang bug-at nga sala ug paglapas sa unang sugo sa Dios mao ang dili pag-ila kaniya nga matuod nga Dios ang pagpuli  ug pagsimba sa mga dios-dios, ang dili pagdawat nga siya lamang ang bugtong Dios nga moluwas kanato, ang dili pagdawat sa iyang kabobot-on, ang dili pagsimba kaniya ug ang pagbuhat sa mga gidili niini.

Mga kaigsoonan, usa sa mga sala ug paglapas sa maong kasugoan mao ang pagbuhat ug pag-ila sa mga dili angay nga mga pagtulun-an nga bunga lamang sa huna-huna sa tawo nga wala lamdagi sa Dios, mga pagtoo nga wala mahisubay sa kamatuoran, mga pagtulun-an nga walay padulngan ug MAKAPAWALA SA PAGSALIG SA MATUOD NGA DIOS, mga pamatasan, lihok ug buhat nga iya sa tawo lamang. Busa kon ania kita niining butanga ato kining isalikway, hinolsolan ug ikumpisal sa Dios, ilabi na karon daghang magtotoo ang nagtamod, nagatuo ug nagabuhat niini sama sa mga PATUO-TUO O SUPERSTITIOUS BELIEF ug uban pa.