Libreng eskwelahang-kolehiyo para sa Lumad itukod

NANGITA karon ang isa ka dakung institusyon sa kolehiyo og 100 ektarya ngadto sa 300 ektarya nga Yutang Panulondon o ancestral domain nga adunay Certificate of Ancestral Domain Title(CADT) kay tukoran og Lumad Leaning Center (LLC).

Ang LLC isa ka kolehiyo nga tulonghaan nga magpa-eskwela og libre ngadto sa mga Lumad kon indigenous peoples (IPs).

Ang mensahe nga nadawat sa Indigenous Peoples Information and Development (IPID), Inc., nagbutyag nga ang LLC paga-eskwelahan usab sa taga-laing nasud nga IPs, mao nga ang lugar nga tukoran sa LLC mailado gayud sa tibuok kalibotan.

Giingon sa IPID nga ang magtukod og LLC isa ka dakung pundok sa ilado nga mga kolehiyo sa nasud diin adunay dakung pagpakabana aron ang kabataang Lumad makaangkon sa maayong kaugmaon pinaagi sa edukasyon.

Ang IPID nag-awhag sa mga lideres sa tribu nga kung aduna sila 100 ka ektaryang kayutaan nga ilang patukoran sa LLC diin adunay CADT o kaha giproseso pa ang CADT mahimong motawag sa Selpon 09486746665.( Kim Lanos)