Buhat Nga Maayo, Dili Panimalos Makabuntog Sa Dautan

Usahay makabalita kita nga usa ka “manager” gipatay human niya gipalagpot ang tapulan nga trabahante. Usahay makadungog kita nga usa ka politiko gipusil human mipildi sa iyang kaatbang sa eleksiyon.

Tinuod nga niining mga kasinatian, sayon ug dali ang paghusga nga panimalos ang motibo. Sayon kaayo ang pagpanimalos uban sa pagtuo nga matagbaw ra ang gibati human makabalos. Apan sa kaulahian, makaamgo kita nga ang pagpanimalos dili sulbad ug dili garantiya sa kaayo nga gipangandoy, kondili makahaling hinuon sa dugang pang kasakit.

Mao kini nga si Kristo nagpalahi sa Iyang pamaagi kay kanato. Lahi ang Iyang gihimo sa dihang Siya nasakitan ug gisalikway kay Siya mipasaylo ug nagmahal hinuon. Diha lamang sa madawaton ug mapasayloon nga kinaiya maangkon ang tinuod nga kalinaw ug kaayohan.

Kini ang Iyang awhag sa matag usa kanato. Kinahanglan ang atong gugma ug pagdawat sa isigkatawo molahi sa kasagaran, dili aron lang kita magpalahi, apan aron kita mahimong Kristiyano nga tinuod. Lahi ra gyud ang pagkatinuod nga Kristiyano kay molabaw kita sa kasagaran.

Ang kaayo nga atong gibuhat adunay positibong epekto ngadto sa nagbuhat kanato’g dili maayo. Unang pananglitan, dihay estudyante nga mapahitas-on ug nagbugal-bugal sa iyang “classmate”. Sa dihang siya nasakit, ang iyang “classmate” maoy nibisita kanunay kaniya ug nagpahibalo unsa ang ilang leksiyon. Kini nakapausab sa bugalbugalon nga estudyante. Ikaduhang pananglitan, ang silingan nga estrikto kaayo ug dili gani managad sa isigkatawo nabag-o human niya masayri nga ang silingan niya nga wala niya ginatagad mao diay ang nagdala sa iyang anak nga nadisgrasya ug mibayad pa sa “damage” sa hospital.

Lahi gayod ang kaalam ni Kristo kay dili kalibotanon. Mabalaan unta kita pinaagi sa pagpranka og estorya sa nasilo kanato ug dili kita manimalos, kay ang pagbalos walay maayong padulngan. Daugon unta nato ang dautan pinaagi sa pagbuhat og maayo.