Simbahan: Katawhan ug Sakramento

P: Unsa ang gipasabot sa pag-ingon nga ang Simbahan mao ang malukpanong sakramento sa kaluwasan?

T: Kini nagapasabot nga siya mao ang timaan ug kahimanan alang sa pakig-uli ingon man sa pagkahiusa sa tanang katawhan uban sa Dios ug sa panaghiusa sa tibuok kaliwatan sa tawo.

Ang Simbahan: katawhan sa Dios, lawas ni Cristo, templo sa Espiritu

P: Ngano nga ang Simbahan mao ang ‘katawhan sa Dios’?

T: Ang Simbahan mao ang’katawhan  sa Dios’ tungod kay gikahimut-an sa Dios ang pagbalaan ug pagluwas sa mga tawo, dili sa paagi nga binulag sa usag usa kon dili pinaagi as paghimo kanila nga usa ka katawhan nga tinigom diha sa kahiusahan sa Amahan ug sa Anak ug sa Espiritu Santo.

P: Unsa ang mga ilhanan sa katawhan sa Dios?

T: Ang usa mahimong sakop niining maong katawhan pinaagi sa pagtoo kang Cristo ug sa Bunyag. Ang gigikanan niining maong katawhan mao ang Dios nga Amahan; ang ulo niini mao si Jesucristo; ang iyang dalisayng timaan mao ang kahalangdon ug kagawasnon sa mga anak sa Dios; ang balaod niini mao ang bag-ong sugo sa gugma; ang iyang misyon  maon ang pagpakahimong asin sa yuta ug kahayag sa kalibotan; ug ang iyang padulngan mao ang Gingharian sa Dios, nga gisugdan na dinhi sa yuta.

(Cf. Kompendiyo sa Katekismo sa Simbahang Katoliko, 152-154)