Parish Day gisaulog sa VDP

Aron sa paghatag ug pasalamat, pagtigum ug pagbinayluay ug pakita sa mga talent gisaulog sa Parokya sa Virgen Dolorosa (VDP) sa Babak, Island Garden City of Samal ang ilang Parish Day subay sa tema: Mga Pangulo ni Virgen Dolorosa: Usa ka Pamilya Nagkahiusa.

Kini usa ka tinuig nga panagtigum sa tanang mga pangulo sa mga GKK ug mga ministriya nga nagalihok sa parokya.  Nagkalain-laing mga parlor games ang gidula inubanan sa paindigay sa sayaw ug panaygon. Nahimong mas mabulukon ang pagsaulog karong tuiga kay imbes ang mga pangulo ang modawat ug mga pahalipay gikan sa parokya, sila na hinuon ang nihatag sa ilang mga gasa alang sa mga nabiktima sa bagyong Yolanda.

“Dako kaayo nakong kalipay ug garbo nga kita nagkahiusa ug nagpakita kamo sa inyong pagkamanggihatagon. Siguradong hulipan kana sa dakong grasya sa Diyos,” mensahe ni Msgr. Nelson Lucas ang Kura Paroko. Gipahinumdum usab ni Msgr. Lucas nga ang tinuod nga mensahe sa pasko mao ang paghatag sa Diyos sa iyang Anak nga si Hesus taliwala sa kalisod.

                Gitambongan usab ang maong selebrasyon ni Mayor Aniano Antalan kung asa nagpadula ug nihatag pud siya ug papremyo.  Ang mga niguwang mananaog sa paindigay sa sayaw mao ang Distrito 1: 1st place, Distrito 7: 2nd place, ug Distrito 3: 3rd place; sa paindigay sa daygon, Distrito 2: 1st place, Distrito 6: 2nd place, ug Distrito 7: 3rd place.