Angay ba nga hatagan ug Debosyon si Birheng Maria?

Si Birheng Maria adunay dakong partisipasyon sa pagpangluwas kanato ni Ginoong Hesukristo (cf. Juan 3:16, Mateo 1:20-23). Si Hesukristo wala mianhi sa kalibutan gikan siya sa langit ug deretso nga mikanaug sa yuta, kondili miagi siya sa hustong proseso sa PAGPAKATAWO. Siya gibuntis ug gianak ni Birheng Maria (cf, Isaias 9:6, 7:14, Mateo 1:23) diin mikuha siya ug lawas ug dugo nga maoy nakapahimo niya nga usa ka Tawo (Gal. 4:4). Tungod sa iyang paghalad sa kinabuhi ngadto sa krus ug pag-ula niya sa iyang bilihong dugo nakatagamtam kita ug kaluwasan.

Hebreo 9:14 – Unsa ka labaw pa gayud niini ang mahimo sa dugo ni Kristo, nga pinaagi sa Espiritu nga dayon mihalad sa iyang kaugalingon nga walay buling ngadto sa Dios, sa paghinlo sa inyong kalapasan gikan sa mga kasal-anan aron magaalagad kamo sa buhi nga Dios. Ug sa maong dugo ug lawas nga maoy niluwas kanato klaro ug tataw kaayo nga may kabahin gayud si Birheng Maria niana sanglit si Kristo kaniya man mikuha ug lawas ug dugo.

Angay gayud nga atong hatagan ug bili si Birheng Maria nganhi sa atong kinabuhi, maingon nga Inahan siya ni Kristo nga maoy nagluwas kanato siya usab atong Inahan (Buhat 1:14). Ang debosyon ug pag-ampo nato kang Birheng Maria dili imbento, o nitungha lang ba hinoon o gitudlo lamang kini sa pari, kondili gikan kini sa pagpili kaniya ug nganha kaniya ipakatawo ang Anak sa Dios. Si Maria nag-ingon nga ang tanang kaliwatan motawag kaniyag bulahan (Lucas 1:48), tungod sa iyang talagsaong pribilihiyo nga maoy napili nga Inahan sa Dios (Lucas 1:43).

Ang pag-ampo kang Maria dili sabton nga giampoan siya ingon nga Dios o diosa sama sa ginatudlo ug gipasangil sa mga tawo nga dili modawat kaniya, kondili nag-ampo ta kaniya isip usa ka Inahan nga makatabang kanato. Nasayod kita nga siya duol kang Kristo ug sa Amahan, sanglit siya Inahan ni Kristo (Mateo 1:23). Pinili sa Amahan (Gen. 3:15, Lucas 1:30), ug Esposa sa Espiritu Santo (Lucas 1:35). Ang iyang mga pag-ampo dungganon gayud sanglit si Jesukristo mismo maoy ngapadayag nga siya atong Inahan ug atong pagadawaton. Kini nahitabo samtang nagbitay pa siya sa Krus ug nakita niya si San Juan nga iyang tinun-an sa iyang tiilan uban ang iyang Inahan nga si Maria siya miingon “Babaye ania ang imong Anak, ug unya miingon siya sa iyang tinun-an, Ania ang imong Inahan” (Juan 19-26-27).