Ang Kapistahan ni Sr. Sto. Niño!

Usa sa mga inila nga kapistahan nga atong ginasaulog dinhi sa Pilipinas, mao ang kapistahan sa STO. NIÑO, diin minilyon ang adunay lalom nga debosyon niini. Sumala pa sa mga nagtoon sa atong kultura ang pagtamod sa Sto. Nino usa sa mga timailhan nga kita lumad nga Filipino gayud, ug ang mga imahen niini sagad nato kining makita sa matag-panimalay ug mga establisemento.

Dili nato ikalimod nga adunay pipila ka mga deboto nga wala mahisubay sa sakto nga kahulogan sa maong selebarsyon ug daghan ang mga nahimong panatiko niini. Pipila sa mga tawo nakisabay sa maong kasaulogan nga ang mga pa-bwenas lamang sa kinabuhi ang ginahuna-huna, dili ang pagbalaan, pagtahud ug pagsimba nato sa BATANG HESUS.

Maayo man mangayo ug kaayohan sa atong kinabuhi. Dili nato hikalimtan nga ang mensahe mao ang pagpamalandong nga ang Dios nagpakatawo. Miagi siya sa pagka-bata, nga mahimo nato nga ehimplo isip walay bahid sa pagkadautan sa huna-huna, masinugtanon, mapaubsanon ug walay pagdumot ug kasuko. “Mas maayo nga magpakasama kamo niining mga gagmay’ng bata kay ang gingharian sa langit ilaha…” (cf. Mateo 18: 1-6 ug Mateo 19:35).

Ang gigikanan niini nga selebrasyon mas naila sa ngalan nga Sto. Nino de Cebu ((“Holy Child of Cebu”), mao ang pagtahud sa Batang Hesus. Usa kini sa pinaka-karaan nga debosyon dinhi sa Pilipinas nga nakahatag ug nindot nga kasaysayan sa pagka-diskubre sa Pilipinas.

Niadtong Abril 14, 1521, si Ferdinand Magellan mihatag ug larawan sa Sto. Nino ngadto kang Rayna Juana isip gasa niya sa dihang siya gibunyagan. Ug milabay ang kwarentay-kwatro ka tuig niadtong April 27, 1565 sa dihang miabot si Miguel Lopez de Legaspi ug Fr. Andres de Urdaneta. Sa ilang paghiabot, nakita ni Legaspi ang karaang lugar diin gihatag ni Magellan ang larawan sa Sto. Nino. Lahi na kini kay nasunog ug nanga-guba ang mga kabalayan ug komunidad. Usa sa mga sundalo nga ilang kuyog, si Juan Camus, nakaplagan ang larawan sa Sto. Nino sa usa ka nasunog nga balay diin ang larawan wala gayud matatsahi bisan gamay. Anaa gihapon siya sa iyang nindot nga panagway. Kadto ang hinungdan diin nagsugod ang pagkuyanap sa maong debosyon sa Sto. Nino tungod sa maong milagro.

Karon, ang milagrosong larawan gipahimutang sa Konbento sa Parokya  ug ang replika gidayan-dayanan sa mahalon nga bulawan ug nindot nga sapot ug gibutang sa usa ka balay-balay nga samin sa kilid sa Altar  sulod sa Basilica Minor del Santo Niño sa Cebu. Nilibo ang nagaduaw niini matag-adlaw. Daghang masakiton nanga-ayo, daghang tawo nausab ug daghang nagrasyahan tungod niini nga debosyon. Kini usa ka maayong hiyas nga paghatag ug sakto nga debosyon kay dili simpleng tawo o bata ang atong gipahinungdan kondili ang magbubuhat sa kalibutan, ang tinubdan sa tanang grasya, ang Dios nga nagpakatawo ug nagpakamatay alang kanato, ang ikaduhang Persona sa Santisima Trinidad. Hatagan nato ug debosyon ang iyang pagka-bata kay tinuod man nga miagi siya niana sa iyang pagka-tawo. Sanglit siya Dios man, angay natong handomon ang iyang pagka-bata, isip modelo sa pagkamapaubsanon.