Ang Apostolado sa Bibliya ug Social Media

Karong Dominggoha gisaulog na usab nato ang naandang “Nasudnong Dominggo sa Bibliya, human sa usa ka semana nga mga kalihokan labot sa Bubliya.

Daghan na ka tuig ang milabay sa paghatag og pagtagad, sa atong Simbahan diri sa Pilipinas, sa pag-umol sa mga yanong katoliko ug sa mga magtutudlo o formators nila, bahin sa Bibliya. Gitinguha nga pinaagi niini, mas malamdagan ug magiyahan ang ilang Kristohanong kinabuhi ug mas madugtong ug mahubad ang pag-toon diha sa kinabuhi.

Mao nga karon anaa na nahiapil sa matag Parokya, GKK, tulunghaang Katoliko, ug sa mga movements sa layko ang apostolado sa Bibilya. Busa, dunay Bible distribution, Bible enthronement sa panimalay, Bible Seminars, mga Bible Sharing, Bible Quiz, Bible Jamboree, Bibliodrama, Bible Study, Bible Songs Competition, Pormasyon sa mga Bible apostolate workers, ubp. Hinay-hinay, nahigmata na ang mga Katoliko nga dili ra ang mga Protestante ang angay nga may kasayuran sa Bibliya, apan kitang mga Katoliko usab.

Ang maong kasinatian atong gipasalamatan niining tinuig nga selebrasyon sa Bibliya. Ang mga nagpasiugda ug nagpahigayon niini, sa mga tuig nga milabay,  atong gipasalamatan. Mahinumdum gayud ako sa dakong duso ug tabang sa usa ka Paring SVD, nga karon Obispo na, nga maoy nagdasig gayud nga masugdan kining maong apostolado dinhi sa Mindanao. “Ginoo, panalangini ug pasalamati si Obispo Arturo Bastes, SVD, D.D.”

Sa miaging lima ka tuig, napahigayon ang Ecumenical Bible campaign, May They Be One diin gitinguha nga ma-apodapod ang 5M ka Bibliya sa mga Pilipinong banay sulod sa lima ka tuig 2008-2013. Ang CBCP ug Philippine Bible Society (PBS) nagkaalayon alang niini, binuligan sa mga laing Bible societies sa laing nasud sama sa Canada ug Australia. Tingali padayonon pa kini tungod kay wala pa maabot ang target nga 5M. Apan, dili pa igo ang pagapod-apod sa Bibliya. Kinahanglan ang hiniusang pormasyon bahin sa Pulong sa Dios.

Niining Tuig sa mga Layko, mapuslanon ug mahinungdanon kaayo ang pag-pausbaw pa sa atong apostolado sa Bibliya. Gidapit ug gihagit kita karong panahon nga mangadto sa mga kabataan ug batan-on ug ipaambit si Kristo ang Buhing Pulong sa Dios, diin sila mahibalag pinaagi sa SOCIAL MEDIA

Dili ikalimod nga diri sa Pilipinas, ang mga kabataan kaaron nagkaanam na og hanas sa paggamit niining bag-ong paagi sa paglambigitay. Ang ilang kapasidad sa paggamit niini natabangan sa pag-abot sa ilang mga lugar sa mga communications network. Dili mahimo nga ang Simbahan nato karon dili mahilambigit niining maong dalan.

Busa, human sa pila na ka dekada sa apostolado sa Bibliya, panahon na nga ubos sa awhag ug duso sa NEW EVANGELIZATION, mangadto kita sa mga kalungsuran ug kabaryohan pinaagi sa Social Media. Kinahanglan ang pag-umol og bag-ong mga lumilihok sa apostolado sa Bibliya nga makat-on niining bag-ong paagi.