Tuig sa mga Layko nga MakaDiyos ug Makabayan

Sumala sa kalendaryo sa “Era of New Evangelization 2013-2021” ang TUIG SA MGA LAYKO saulogon sa 2014. Karon pa lamang, mangandam na kita, aron mahimong mabulokon ug mabungahon ang sunod tuig alang sa pinakabagang hut-ong sa Simbahan – ang mga Layko.

Ang CBCP, sa iyang sulat pastoral bahin sa era of new evangelization, mipadayag nga ang tuig 2014 magpunting sa pagbag-o ug paghigmata sa mga Layko aron mapadasig pa ang ilang mga gasa gikan sa Spirito Santo nga nadawat na nila pinaagi sa sakramento sa BUNYAG ug KOMPIRMA.

Gikan sa daghang mga nabunyagan ug nakompirmahan, angkonon nato, nga ang daghan kanato wala pa gayud nakaamgo ug nidawat sa kahulugan ug sangputanan sa atong kinabuhi, bunga sa maong mga sakrmento. Si Kristo nga atong gitoohan ug gisimba wala gayud nato gisunod ug ang iyang kasantos wala gayud nato gisul-ob. Daghan ang binunyagan ug gikompirmahan apan wala maumol o mamatuto sa Kristohanong kinabuhi sama sa gipaabot kanila.
Dako kaayo ug malukpanon ang maong katungdanan sa mga Layko tungod kay naa sila sa kalibutan. Sila unta ang magbag-o sa kalibutan sa kultura, sa politika, sa arte, sa kommunikasyon, sa panalapi, pamilya, panglawas, subay sa Ebanghelyo ni Kristo. Alang niining misyon sa Layko, kinahanglan ang hamtong, lig-on, ug buhi nga pagtoo aron sa pagsagubang sa kalibutan kansang kamatngonan sa Diosnong pagkaanaa nagka-uga na ug ang mga kasingkasing nagkasarado na. Busa, nagkinahanglan sila og pag-umol sa pagtoo nga sakto ug haom sa ilang lainlaing kahimtang.

Ang CBCP Commission on Laity(ECLA), nagpahigayon og pormasyon agi’g pagpangandam alang sa Tuig sa Layko. Nag-ulohan ang seminar / workshop “HOLY HEROES, CALLED TO BE SAINTS…SENT FORTH AS HEROES.” Pinaagi niining pormasyon ang mga Layko gipamatngon ug gidasig nga modawat nga magkinabuhi diha sa kasantos sa Diyos ug kamaalagaron sa katilingban ug sa nasud. sa ato pa, balaan ug bayani. Duha ka adlaw nga presentasyon sa mga “modules” ang gipahigayon, ug kinahanglan pa kini mapahaom sa nagkalainlain kahimtang sa mga tawo sa simbahang lokal.

Mga partisipante gikan sa lainlaing rehiyon sa nasud, gitigom didto sa Luzon, sa Mindanao, ug sa umaabot, sa Visayas. Sa rehiyon sa Mindanao, napahigayon na ang seminar niadtong Nobiyembre 25-27, 2013, didto sa General Santos City. Kompleto ang partisipasyon sa Daditama. Matod pa sa mga nagdumala sa maong seminar, nga sila si Mons. Jojo Galvez, Sr Lydia Collado, RSCJ, Ms. Rica Lavilla, ug Mr. Syd Baradi IV, ang grupo sa Mindanao nagpadayag kuno og lahi nga diwa ug kadasig, nga wala nila makita sa laing rehiyon. Ug kini nakahahatag kanila og dugang kadasig sa ilang gipaningkamutan ug ilang gikapasalamatan.

Busa paaboton nato ang mga programa ug kalihokan nga ihan-ay sa matag diyosesis aron magmapuslanon ug mabungahon gayud ang TUIG SA MGA LAYKO.