Sulat Pastoral alang sa Tuig sa mga Layko

Mga kaigsoonan ko diha kang Kristo:
“Gitawag nga mahimong Santo… Gipadala nga mga Bayani”
Human sa Tuig sa Pagtoo, kanus-a nakakaplag kita og dugang kahulugan ug kalipay sa Pagtoo kang Kristo ug naandam ug nadasig pag-usab nga mopaambit ug mosaksi niining kinabuhia, ania na usab ang laing yugto sa atong siyam ka tuig nga pagpangandam alang sa Hubileyo sa ika-500 nga kasumaran sa unang bunyag ug misa diri sa atong kapupud-an. Kini ang Tuig sa mga Layko Diciembre 2013 – Nobiyembre 2014.

Nasayud kita nga sa tulo ka hut-ong sa mga katoliko – ang mga Layko, mga Pari, ug mga Konsagrado lalaki ug babaye, ang nauna mao ang labing dakong pundok. Gikan sa ilang pundok nagagikan ang mga magtiayon ug mga pamilya diin mahimugso ug unang maandam ug maumol ang mga bokasyon ngadto sa lainlaing ministriya nga gikinahanglan sa Simbahan. Niining pundok usab magagikan ang mga opisyales sa lihistradura, hudikatura, ug ehekutibong bahin sa panggamhanan. Gikan usab dinhing pundok ang mga magtutudlo, negosyante, mananambal, ug tanan nga gikinahanglang serbisyo sa katilingban. Busa, labing importante kaayo silang bahin sa kinabuhi ug misyon sa Simbahan ug sa sosyodad.

Sa atong Diyosesis sa Digos, dayag kaayo kining kasinatian. Ang atong mga parokya, mission stations, mga GKK, ug mga kapunungan sa Simbahan sa milabay nga mga dekada nagmadasigon kaayo tungod sa nagkadaghan sa mga Layko nga misanong sa pakiglambigit sa kinabuhi ug pagpangalagad sa Simbahan. Mapasalamaton kaayo kita sa ilang pagkagasa, dili lamang sa ilang kaugalingong pamilya, apan ngadto usab sa Simbahan ug katilingban, ilabi na diha sa mga Gagmay’ng Kristohanong katilingban (GKK). Matag adlaw, bisan lamang sa ilang matinud-anong pagtuman sa ilang mga ordinaryong mga tahas sa kinabuhi, sa maalagaron ug masakripisyohong paagi, gipakita na nila ang tinuod nga pagkinabuhi sa kasantos ug pagkabayani.

Sa mga nangaging mga kalamidad nga atong nahiaguman sa kasaysayan sa atong nasud, kanunay nagpadayag ngadto sa tanang katawhan niining maong pagkagasa sa mga layko. Taliwala sa makalilisang nga kalamidad, mitumaw dayon ang pakiglambigitay ug pagkamanggihatagon sa panahon, talento ug katigayunan, dili lamang dinhi sa nasud apan gikan usab sa laing nasud. Ang mga layko dayon ang unang madasig sa paglihok ug pagtabang kutob sa ilang kapasidad. Kinaiya gayud sa tawo nga mabination, matinagdanon, matinabangon, mahigugmaon, mosakripisyo alang sa uban.

Nagatoo ako nga usa ra ang sukaranan niining diwa ug paglihok alang sa kaayuhan ug kaluwasan sa isigkaingon. Kining ginatawag natong BAYANIHAN, DAMAYAN, PANAGLAMBIGIT, ALAY KAPWA, CARITAS ubp. Kini mao ang Diyos nga anaa sa tanang kasingkasing sa tawo nga gibuhat sa Diyos sa Gugma. Ma gamay’ng bata, edaran, dato o pobre, gamhanan o dili, ang kasingkasing sa tawo parehas ra. Nagapitik duyog sa pitik sa Mahal nga Kasingkasing ni Jesus ug Putling Kasingkasing ni Maria. Kini ang atong gitoohan ug gihuptan nga kamatuoran.

Busa, bisan pa sa mga unos ug katalagman nga moabot sa atong kinabuhi, malaumon ug masaligon lang gihapon kita nga anaa sa kanunay nga magauban kanato ang Diyos nga kasaligan ug matinud-anon sa tanang panahon. Makabangon ra gihapon kita, dinhi sa yuta maingon man sa langit. Ang kalibutan nato karon nga magasagubang sa lainlaing mga hulga ug hagit sa kinabuhi, naga-anam na og pamatngon balik sa pagkasayod ug pagdawat sa limitasyon sa kaalam ug kusog sa tawo. Aron maluwas kita, kinahanglan nga mobalik kita sa pagdawat, pagtahod, pagtamud ug pagsunod sa pagbuot sa Dyos.

Kining maong Dios sa Gugma, sulod sa mga kasingkasing sa daghan kaayong mga Layko ang buot pukawon ug palig-onon ug pabungahon pa niining Tuig sa Layko. Sa ingon, mamahimo pa silang mga maluwasnon ug maangayong presensya sa tanang kahimtang sa kinabuhi, pinasikad sa Ebanghelyo ni Kristo.

Gawas sa mga kalamidad nga natural, duna pay laing kalamidad nga dugay na kaayong nagadaot ug nagagapos sa katawhan, sama sa, korupsyon sa pundo sa panggamhanan, ang mga illegal nga droga ug sugal, ang daghang mga kahilayan ug ang padayong pagguba sa kinaiyahan, ang sistemang politikal sa nasud, ang dili balanseng pagbahinbahin sa bahandi sa nasud, ang dakong kulang sa edukasyon ug sa pag-amping sa panglawas sa katawhan….ubp. Niining kahimtang nato karon nagkinahanglan usab og mga matarong ug balaan nga mga tawo – mga bag-ong bayani.

Dili nato kalimtan nga sa miaging Hunyo 8, 2013 ug sa mga unang sabado sa bulan nga misunod, gibalibalik nato ang pagtugyan ug paghalad sa nasud ngadto sa Putling Kasingkasing ni Maria. Human niini, sa pagtapos sa Tuig sa Pagtoo niadtong Nobiyembre 24, 2013 sa pangilin sa Kristong Hari, gihimo nato ang paghalad ug pagtugyan sa atong mga banay sa Mahal nga Kasingkasing ni Jesus. Kining duha ka dakong hitabo sa atong Simbahan nagpukaw ug nagdasig kanato nga molihok subay sa tawag sa panahon…. ang PAGHINULSOL SA SALA, ang PAGPENITENSYA UG PAGTARONG SA MGA SALA UG SAYOP, ang PAGBALIK NGADTO SA PANAW NGA MAPAUBSANON UBAN SA DIYOS.

Dunay mga lainlaing mga kalihokan alang sa parokya ug sa mga tulunghaan nga ipahigayon alang sa pagkab-ot niining katuyuan sa Tuig sa Pagtoo. Busa, gihangyo ko kamong tanan nga magmakugihon nga moapil niining mga kalihokan. Suportahan unta ninyo, sama sa gihapon, ang inyong mga lideres sa Parokya ug mga Catholic Schools nga magapahigayon niining balaanong panahon.

Kamong mga Pari sa parokya, mga Presidente ug Principal sa mga Catholic Schools, mga nangulo ug nangalagad sa atong mga GKK, ug ang mga Presidente sa mga kapunungan ug movements nga Katoliko, giawhag ko nga makig-alayon sa mga nagdumala kaninyo aron mapahimuslan nato pag-ayo kining balaang panahon sa Tuig sa mga Layko.

Niining atong hiniusang pagsaulog sa ADLAW NI MARIA, Diciembre 7, 2013 , sa unang Sabado sa bulan sa Sagrada Pamilya, uban sa dakong pagsalig sa panabang sa Dios, atong ilunsad kining TUIG SA MGA LAYKO – “Gitawag nga mahimong Santo…gipadala nga mga Bayani.”
Masaligon kitang modangop sa atong Mahal nga Kasingkasing ni Jesus uban sa iyang mahal nga Inahan, ang Putling Kasingkasing ni Maria, aron kining Tuig sa mga Layko, nga iyang gidasig nga saulogon nato, makab-ot ang tanan niyang katuyuan ug magbunga sa pagbuhagay sa nagsingapin nga Diosnong Kalooy alang sa katubsanan ug kaluwasan sa tanang katawhan ilabi na ang atong mga Layko.

Uban kaninyong nagapanaw sa Pagtoo,

Guillermo D. Afable
Obispo sa Digos
Diciembre 1, 2013