San Francisco Javier: atong Modelo sa Pagpakaylap sa Misyon ni Kristo

Ang misyon ni Kristo maoy katumanan sa kabubut-on sa atong Langitnong Amahan ug ang pagpakaylap niini usa ka mapadayonong hagit sa tibuok simbahang katoliko alang sa kaluwasan.

Si Kristo ang bugtong anak nga gipadala sa atong Langitnong amahan gikan sa langit aron pagbuhat sa iyang kasugoan ug pagtum,an sa iyang kabubut-on pinaagi sa tulo ka pilo nga mga misyon nga parianon, propetanhon ug harianon. Ang misyon ni Kristo nga parianon maoy pagsimba kanunay sa iyang Makagagahum nga Amahan ug paghalad sa iyang kaugalingonon alang sa kaluwasan. Ang iyang harianong misyon usa ka pag-alagad sa mga kabos, pagtabang sa mga nanginahanglan ug uban pa. ug ang iyang mapanagnaong misyon mao ang pagwali sa Maayong Balita, pagkabig sa mga makasasala ug paghimong Kristiyanos sa mga dili pa Kristiyano.

Ang mensahe sa maong misyon mao ang pagsangyaw mahitungod sa gingharian sa Dios alang sa kaluwasan nga gituman ug gipakaylap sukad pa kaniadto sa mga apostoles, mga santos, ug sa uban pang gitugyan ni Kristo sama sa mga kaparian, diyakono, ug mga layko. Gipiyal ni Kristo ang iyang misyon sa simbahan pinaagi sa pagsangyaw ug pag tukod sa gingharian sa Dios. Ang tanang sakop sa simbahan nga binunyagan nakaambit gayud niini. Buot pasabot ang matag usa kanato nga binunyagan adunay kaakohan pagpakaylap sa misyon ni Kristo subay sa kabubut-on sa Dios tungod kay nakaambit man kita sa pagkapri, pagkapropeta ug pagkahari ni Kristo.

Ang pagpakaylap sa misyon ni Kristo dakung hagit gayud sa matag usa kanato karon tungod sa kiasamtangan sitwasyon sa tong simbahan nga adunay pipila ka mga sakop nga nagakakunhod na ang ilang pagtuo, wala nay pag-atiman ug pag-alagad sa mga kabos, nagakaluya na sa pagsubay sa dalan sa kaluwasan, nagkahinay na sa pagwali sa Maayong Balita, nawad-an na sa paglaum ug kakugi sa pagsimba, dali ra kayo motalikod sa Ginoo sa higayon nga makatagamtam og mga nagkadaiyang pagsulay sa kinabuhi.

Diha sa atong pagpakaylap sa misyon ni Kristo mamahimo unta natong modelo si San Francisco Javier, diin ang iyang kinabuhi nagahulagway sa Kristohanong misyon nga mabungahon tungod sa iyang kalig-on sa pagtuo, karisma sa pagpangalagad sa mga kabos, kakugi sa pagpalambo sa pagtuo sa uban, kaisog sa pagbarug sa kamatuoran sa kaluwasan, mapadayonong pagsakripisyo sa pagkatekismo, pagpuyo sa pagkakabos ug paghimamat kanunay sa Ginoo.

Sama ni San Francisco Javier, aduna gayud kitay misyon dinhi sa kalibutan kon espesyal nga katungdanan. Bisan tuod usa kini ka dakong responsibilidad apan usa ka butang nga dili katuohang kadungganan ni Kristo. Ang atong misyon maoy kapadayonan sa nasugdang tulo ka pilo nga mga misyon ni Kristo. Kita ang mga instrumento sa Ginoo sa pagpadayag sa kamatuoran mahitungod sa gingharian sa Dios, pagpasakit, pagkamatay ug pagkabanhaw ni Kristo.

Sa katapusan, atong hinumduman kanunay nga ang pagpadayon sa pagpakaylap sa misyon ni Kristo angay gayud nga magsugod mismo sa atong kaugalingon nga puno sa mga birtudes sama sa pagtuo, paglaum ug paghigugma, inubanan sa kadasig ug pagsakripisyo sama sa gibuhat ni San Francisco Javier isip atong modelo.