Pamilya Nabalaan Sa Pulong Nga Nahimong Tawo

Pangilin sa Balaang Pamilya ni Hesus Maria ug Jose
Sir, 3:2-6,12-14 / Col. 3:12-21 / Mt. 2:13-15,19-23

Unsa kaha ang pagbati sa mga pamilya nga biktima sa bagyo ug linog nga hangtod karon mikagiw gikan sa ilang panimalay ug wala pay klaro nga kapuy-an nga tungod sa mga kalamidad naguba ang ilang pinuy-anan?
Ang balaang pamilya ni Jose, Maria ug Hesus mikagiw usab, dili tungod sa natural nga kalamidad kondili tungod sa espirituhanong kalamidad. Sila mikagiw dili tungod sa linog o bagyo nga buot modaut ug sarang mopatay kanila, kondili tungod sa walay pag-ila sa balaang Pulong nga nahimong tawo. Sila gihasol tungod sa garbo, kasina ug sa pagbutang sa kaugalingong seguridad diha sa gahum ug kwarta. Si Hari Herodes nga buot mopatay sa batang Hesus mao ang hinungdan nga mingkagiw sila ngadto sa Ehipto aron pagsiguro sa ilang kinabuhi kay siya wala man moila sa Pulong nga nahimong tawo nga mobalaan sa katawhan. Si Jose ug Maria kanunay gayod nanalipod sa batang Hesus ug naghiusa sa balaang pamilya diha sa ilang pagpuyo sa Nazareth.
Niining pagsaulog nato sa kapistahan sa Balaang Pamilya atong iampo una sa tanan ang mga pamilya nga mingkagiw sa ilang mga panimalay nga nagun-ob tungod sa mga kalamidad. Iampo nato nga bisan wala silay klaro ug disenteng kapuy-an sa pagkakaron, sila makasinati sa kaayo sa Ginoo pinaagi sa mga hinabang ug pagtagad sa ubang tawo.

Ikaduha, iampo usab nato nga ang mga pamilya nga nagpuyo og disenteng panimalay unta sa pagkatinuod magpuyo diha sa pagtahud ug pag-atiman sa matag-usa. Manghinaut kita nga maghari unta sa matag miyembro sa pamilya ang pagpasaylo ug pagdawat sa kakulangan sa matag-usa. Mapadayag unta sa matag miyembro sa tagsa-tagsa nato ka mga pamilya ang pagdayeg ug pagpasalamat sa Dios nga naghiusa kanila.
Ug sa katapusan, malambigit unta ang matag pamilya diha sa pagsangyaw ug pagpuyo sa Pulong nga Nahimong tawo aron mabalaan ang matag-usa. Iampo nato nga ang tibuok bag-ong tuig nga moabot magbalaan unta sa matag pamilya subay sa panig-ingnan ni Jose, Maria ug Hesus. Malipayong Pasko kanatong tanan!