Natural Family Planning practitioners gipasidunggan

Gipasidunggan sa Family and Life Apostolate (FLA) ang kapin 72 ka mga magtiayon ug indibidwal nga practitioner sa Natural Family Planning.

Sulod sa Misa nga gipangulohan ni Archbishop Romulo G. Valles, midawat ang mga magtiayon sa certificate of attendance sa gipahigayong NFP training. Ang misa nahitabo niadtong Disyembre 7.

Si Fr. Orlando Angelia, FLA Director, mapasalamaton sa mga magtiayon nga mikat-on mahitungod sa Natural Family Planning tungod kini ang ginatudlo nga epektibo ug natural nga pamaagi sa pagplano sa pamilya.

Ang mga magtiayon maoy magpalugdang sa pagtulon-an sa NFP didto sa ilang tagsa-tagsa ka mga Gagmay’ng Kristohanong Katilingban ug parokya. Sila ang magtudlo sa mga interesado nga mga magtiayon nga magtuon ug mugamit sa Natural Family Planning Method.

Ika-9 nga kapistahan sa Baliok parish gisaulog
Ipahigayon sa Holy Family Parish ang ilang ika-9 nga Parochial fiesta karong Desyembre 29, subay sa tema nga “Katilingban sa Sagradong Pamilya Nagkahiusa sa Pag-amuma sa Pamilya ug Kinaiyahan”.

Gihimo sa parokya ang 9 days novena prayer isip pagpangandam sa adlaw sa kapistahan sugod Disyembre 20 hangtod 28. Ang novena gipangulohan sa nagkalain-laing organisasyon sa parokya. Si Fr. Ricky Peñalosa, Parish Priest sa Holy Family Parish ang nangulo sa unang misa sa unang adlaw sa novena, ug mga giimbitar nga mga pari gikan sa nagkalain-laing parokya sa syudad sa mga sunod nga adlaw.

Sa adlaw sa kapistahan, pangunahan ni Archbishop Romulo Valles ang misa, ug sundan kini ug mga nagkalain-laing mga kalihukan nga giandam sa parokya sama sa: Binyagan sa Parokya, Invitational Basketball game (Clergy vs. GKK Leaders),ug clergy and religious night.

Dako ang paglaum sa mga taga Holy Family Parish nga mamahimong malampuson ug mabungahon ang ilang Parochial fiesta karong tuiga isip pahinungod sa Sagrada Familia ni Jose, Maria ug Hesus.