Maghari Na Ang Dios

Pagkahuman sa linog sa Bohol nga abi nila og mao na kadto ang katapusan sa kalibutan, sila nagpasalamat nga buhi pa gihapon. Human sa “Yolanda”, daghan nakaamgo nga walay butang makahulip sa pagkawala sa minahal sa kinabuhi tungod sa pagkabiktima sa bagyo. Bisan niadtong nahugno ang “Twin Tower” sa Amerika niadtong Setptembre 11, 2001, daghan nakaingun nga walay gahum sa yuta nga muhari tungod sa iyang kaugalingon lamang.

Kining tanang panghitabo karon, nagpahinumdom kanato nga diha lang sa paghari sa Dios maangkon nato ang tinuod nga gahum, ang gahum nga dili mabuntog bisan unsang bagyo o linog o terorismo ang mosulay paggun-ob. Sa unang pagbasa gisaysay nga ang bag-ong Hari manalingsing sama sa kahoy nga giputol. Ang Iyang paghukom dili lamang binasi sa Iyang makita ug madungog kondili sa hustisya. Ang ikaduhang pagbasa naghatag kanato og tinuod nga salamin sa paghari sa Dios nga masinati diha sa katawhang puno sa pailob ug kadasig. Ang Iyang gingharian nagdala og kahiusa ug tinuod nga pagdawat sa isigkamagtutuo.

Niining ikaduhang Domingo sa Adbiyento, mairog unta kita sa mga Pulong nga atong nadungog. Kay unsa bay pulos sa atong pagsaulog sa Adbiyento kung walay tininuod nga pagbag-o sa kasing-kasing nga mapadayag diha sa atong matag-adlaw nga pagtagad sa matag-usa. Kung dili mausab sa hinay-hinay ang atong panglantaw sa mga tawo nga nakapasakit kanato ug huyang sa ilang pagpuyo sa pagtoo, tingali og wala kaayo nato napuy-an ang diwa sa adbiyento. Kung magdumili kita sa pagpakigtambayayong sa uban ug nagmagahi kita sa pagtabang sa nanginahanglan basin baya og dili pa gayod diay ang Dios naghari sulod kanato.

Sama ni San Juan nga miadto sa dapit nga awaaw, diha sa kahilom sa atong kasing-kasing kita unta makasinati sa kahiladman sa atong kinabuhi sa buhing presensiya sa Dios nga magdala og kabag-ohan. Puno sa pagpamalandong ug dili lamang sa daghan natong kalihukang sosyal, ato untang madunggan ug mapuy-an ang kinaiyang Diosnon aron matinuod gayod nga dinhi kanato maghari na ang Dios.