Ang Dios Nagpaila kanato

Is. 6:1-6/ Eph. 3:2-3a, 5-6/ Mt. 2:1-12

Kung magtan-aw ta sa kanindot ug kakatingalahan sa kabuhatan, makahuna-huna kita sa Ginoo ang nagbuhat niini. Kini mao ang “Diyapaniya”, ang Iyang pagpaila pinaagi sa kinaiyahan. Kung mamalandong ta sa kasaysayan sa kinabuhi, kita makaalinggat sa presensiya sa Ginoo. Kini mao ang gitawag nga “Teyopaniya” kon ang Iyang pagpaila kanato pinaagi sa nangaging mga panghitabo.

Karon atong gisaulog ang pagpaila mismo sa Ginoo pinaagi sa Iyang kaugalingong pag-uban kanato diha sa pagpakatawo sa Iyang Bugtong Anak. Siya mipasinati kanato kung kinsa Siya dili lamang pinaagi sa iyang mga binuhat, ni sa kasaysayan, kondili Siya mismo sa Iyang kaugalingon mipuyo uban kanato. “Epipaniya” ang tawag niini.

Ang pagbisita sa mga tawong may kaalam sa mga bituon sa batang Hesus sa Betlehem nagtimaan sa pagpasinati sa Dios sa tanang katawhan. Sila nga gikan sa sidlakan nagrepresentar sa tanang klaseng tawo sa tibuok kalibutan kinsa maoy tuyo sa Dios nga moanhi aron pagpaila ug pagluwas niini.

Sama sa mga tawong maalamon sa mga bituon nga nakasaksi sa kahayag nga mao si Kristo, kita usab unta makasinati sa tanang adlaw sa atong kinabuhi, labi na sa bag-ong tuig nga moabot, sa Dios nga alang sa tanang katawhan. Mamahimo unta kitang maglakaw sa kahayag pinaagi sa pagdawat sa matag usa kanato isip katilingban sa mga magtutoo. Wala untay kolor, tinuohan, estado, kahimtang, posisyon o batasan nga makabalda kanato sa pagtagad nga kinasing-kasing sa matag usa.

Ang palibot nga karon atong gipuy-an ug ang kasaysayan nga atong naagian walay bili kung wala nato masinati ang tinuod nga pagpaila sa buhing Dios diha sa batasan sa matag usa. Walay kahulogan ang kaagi sa atong kinabuhi ug ang paglambo sa palibot nga makita kung napakyas kita sa pagsinati sa Dios kansang presensiya mipuyo uban kanato. Siya unta atong masinati diha sa maayo natong pagtagad ug pagdawat sa matag usa.

Malipayong Pasko ug Bulahang Bag-ong Tuig sa tanan!