St. Francis of Assisi Quasi-Parish ni responde sa 128 ka pamilya nga biktima sa pagbaha

Adunay 128 ka pamilya nga apektado sa dakung baha sa La Verna Hills subdivision, Oktubre 31 pasado alas 7 ang takna ang gi-respondehan sa parokya sa St. Francis of Assisi.

Alas 5:00 sa hapon nagsugod pagbunok ang makusog ug walay hunong nga ulan hinungdan nga nibaha sa La Verna Hills Subd. ug sa mga kasikbit nga subdivision sa distrito 2 sa Davao City.

Daghang lumulopyo ang na-stranded sa superhighway mao nga wala gayud nakasalbar ang mga tawo sa ilang mga gamit sa dihang misaka pagkalit ang tubig. Ang mga apektadong pamilya duol gayud sa simbahan, sa kadalanan sa San Mateo, San Pablo ug San Lorenzo daling gipasilong sa St. Francis of Assisi Quasi-Parish ug gilutuan ug noodles nga gidalit sa mga gipanggutom nga katawhan.

Sumala ni William Villavelez, biktima nga nagpuyo sa San Mateo, alas 7:20 sa dihang misaka ang tubig ug kalit ug kusog kaayo ang current, niabot sa level sa pultahan sa ilang balay ang baha.

Samtang ang mga taga phase 3 sa La Verna Hills Subd. gipasaka sa mga kasilinganan nga wala nabahaan.
Miresponde usab ang Archdiocesan Social Action Center sa Davao nga gipangulohan ni Rev. Bong Dublan, kinsa naghatag ug instruction sa pamaagi sa pagpang-apud sa mga hinabang. Matud niya “Ang disaster usa ka opportunity to feel the presence of the Church; kabahin kini sa Evangelization.”Dugang usab ni Bishop Jorge Rimando nga uban usab nila niadtong higayona, hangyoon ang matag pamilya to hold on to pray maski ug sa makadiyot lang”. Uban sa panon mao sila Rev. Mervin George Maglana ug Vicky Anghag ug ang PSAM sa San Pablo Parish. Lakip sa gipanghatag nga relief goods sama sa bugas, canned goods, noodles ug used clothing ang medical assistance sa natunok ug lansang ug bildo, gihatagan sila ug tetanus toxoid injection.
Sa pagkaudto sa Nov. 1, naghatud ug luto nga kan-on, itlog, noodles ug tinapay sa matag balay sa mga pamilya nga nabahaan ang mga lideres samtang ang mga batan-on nagsort-out sa mga used clothing ug nagbalot sa mga bugas, canned goods, ug noodles alang sa ilang immediate nga panginahanglan.

Mapasalamaton gayud si Fr. Orly Angelia sa tanang nitubag sa iyang panawagan aron ikatabang sa mga parokyano nga nabiktima sa kalamidad nga nahisakop sa iyang pagdumala.