Risk-mapping gisugdan sa mga GKK sa Dabaw

Gisugdan sa mga GKK ang pag-ila sa mga lugar nga duol sa posibilidad nga maapektuhan panahon sa mga kalamidad dinhi sa Archdiocese of Davao.

Ang Director sa Archdiocesan Social Action Center nga si Fr. Leonardo Dublan, Jr. nanghatag og mapa sa mga Parish Social Action Ministers aron ila ilhon kung asa sa ilang tagsa-tagsa ka katilingban ang anaay kasaysayan nga naigo sa baha ug apektado sa mga linog.

Usa kini sa mga bunga sa gihimong Climate Change and Disaster Prevention Seminar sa Archdiocese of Davao nga gihimo niadtong July sa Almendras Gym. Pipila ka mga resource speakers ang giimbitahan aron mapasabot sa mga kaparian ug mga layko ang mga peligro nga dala sa Climate Change ug unsa ang pwede mahimo aron mapa-ubsan ang mga epekto niini sa katawhan.
Tuyo sa mapping project nga mas mapangandaman sa mga katawhan ilabi na kadtong anaa sa mga disaster prone areas.

Kahinumdoman nga daghan ang nangamatay tungod sa pagbaha sa Matina Pangi River ug Talomo River sa Davao City niadtong June 28, 2011.

Daghan usab ang nangamatay ug daghang istruktura ang nangadaot didto sa Compostela Valley ug Davao Oriental pag-abot sa Bagyong Pablo niadtong December 4, 2012.

Sa parokya sa San Pablo sa Juna, ginahimo ang Disaster Preparedness sa mga barangay sama sa Matina Pangi diin nagapatigayon ang Parish Social Action Ministry og mga training alang sa mga taga-GKK. Nag-instalar usab sila og mga device aron mahibaw-an kung unsa na kataas ang tubig sa sapa panahon sa kusog nga ulan aron maka-bakwit na ug malikayan ang danyos.

Aminado si Fr. Dublan nga daghan pa ang trabahoon ug dako ang hagit niining maong proyekto. Apan mas maayo nga gisugdan kini aron menos ang danyos ug wala nay makabsan sa kinabuhi tungod sa walay pagpangandam panahon sa kalamidad.