Naghinapos nga Tuig sa Pagtoo

Nia na kita sa ika napulo’g tulo ka bulan sa Tuig sa Pagtoo nga gisaulog sa tibuok Simbahan pinasikad sa pagdeklarar ni kanhing Papa Benedikto XVI alang sa tuig 2012 – 2013. Magtapos na kining kasaulogan, sa Solemnidad sa Kristong Hari sa umaabot nga Nobiyembre 24.

Napakusgan kining kasaulogan tungod kay ang Catholic Bishops Conference of the Philippines nagdeklar usab sa 2013 isip tuig sa Integral Christian Formation, sa ato pa, ang malangkobong pagumol sa pagtoo. Kabahin kini sa siyam ka tuig nga pagpangandam alang sa ika-5 nga Centennial sa Katolisismo sa Pilipinas sa umaabot nga tuig 2021.

Mapusalanon ug mahinungdanon nga hinayhinay na natong baliklantawon ang nangaging 12 ka bulan. Basi sa mga katuyuan sa Tuig sa Pagtoo ug sa Tuig sa Integral Christian Formation, unsa nay nasugdan na ug ginapadayon pang mga paningkamot sa nagkalainlain nga hut-ng sa Simbahan, aron matagaan ug katumanan ang maong mga katuyuan.

Si Papa Benedikto XVI, sa iyang pag-awhag alang niining Tuig sa Pagtoo, (Porta Fidei), naghatag og upat ka katuyuan. 1. Nga ang mga Katoliko magkapahayag sa kinatibuk-an sa ilang pagtoo uban sa hugot nga baruganan ug puno og pagsalig ug pagalom. 2. Makaplagan pagusab sa mga katoliko ang unod sa ilang pagtoo nga makat-onan sa atong Katesismo. 3. Balikan ang kasaysayan sa atong pagtoo kang Kristo diha sa atong kasantos ug pagpakasala. 4. Mapahingusgan pa ang pagsaksi sa gugma sa isigkatawo.

Alang kanato diri sa Pilipinas natagaan pa gayud kining mga katuyuan og dugang pagpunting tungod kay gitagaan kita sa mga Obispo og 4 usab ka mga paagi nga makatabang. 1. Tagaan og dugang pagtagad ang pangadto sa mga Katoliko nga nahilayo na sa Simbahan, wala na maapil, gikalimtan na, panagsa na lang makaapil. 2. Ang tumong sa tanang programa ug kaliukan magdala sa mga tawo sa pagbag-o sa kinabuhi tungod sa suod nga pagila ug pagtoo kang Kristo. Lantawon si San Lorenzo Ruiz ug San Pedro Calungsod nga mga modelo sa lig-on ug maisogong pagtoo. 4. Balikan ug tuon ang 12 ka artikulo sa atong Credo.

Tungod niini, ang mga kaparian ug ang mga nagkalain-lain nga katekista o magsasangyaw sa Ebanghelyo, gilauman nga gahinan og panahon ang pagtuon sa Katesismo sa Simbahan, ang mga Dokumento sa Ika-2 Konsilyo Batikano. Ang mga Katekista gimandoan nga ginamit ang mga pagtulun-an sa Katesismo, magtukod ug mga gagmayng Kristohanong katilingban, ug makahatag ug dayag nga pagsaksi kang Kristo.

Sa katapusan, miingon ang CBCP nga ang mga Katolikong banay maoy labing importante. Sa mga parokya, matagaan unta sa higayon nga makaangkon sila sa kopya sa Katesismo nga sayon magamit nila ug laing pang mga kahimanan, alang sa ilang pagtuman sa tahas nga mapasa ug mapaambit ang pagtoo ngadto sa ilang mga ginsakpan.

Ang hagit sa Tuig sa Pagtoo ug sa Tuig sa Integral Faith Formation walay lain kon dili ang mamugnaon nga pagpahigayon og bag-ong mga pamaagi, bag-ong mga pagpadayag, bag-ong kasibot alang sa pagsangyaw ug pagsaksi sa Pagtoo kang Kristo ngadto sa katawhan nining atong kapanahonan karon. Mao kini ang hagit sa NEW Evangelization.

Gipaabot nga ang Apostolikanhong Pag-awhag sa Santo Papa, bunga sa Sinodo sa mga Obispo niadtong Oktobre 2012 bahin sa New Evangelization, mogula na sa Nobiyembre 24, ang gitakda nga pagtapos sa Tuig sa Pagtoo. Magahatag kini kanato ug dugang pang katin-awan sa pagsabot sa unod, hagit ug pamaagi sa New Evangelization.
(jimmg48@gmail.com)