Kristong Hari sa Pagtoo

Ika-34 nga Domingo sa Tuig
2 Sm. 5:1-3/ Col. 1:12-20/ Lk. 23:35-43

Gideklara sa kanhing Santo Papa Benedikto XVI nga matapos ang pagsaulog sa Tuig sa Pagtoo atol sa solemnidad ni Kristong Hari. Sa katapusang bahin sa iyang sulat nga Porta Fidei, iyang gisaysay nga usa sa mga nag-unang modelo sa pagtoo mao si Hesukristo. Siya mao ang hari sa pagtoo. Sa unsang pamaagi?
Una, tungod kay Siya gisulay apan padayon nga misalig sa gahum sa Dios. Taliwala sa mga pagbiay-biay kaniya sa klase-klaseng tawo Siya desididong mihimo sa iyang misyon. Ang pagbugal-bugal Kaniya sa mga kadagkoan, sa mga sundalo ug sa kriminal wala makabalda sa Iyang pagtapos sa Iyang tuyo sa pagpangluwas. Naglakaw Siya dili sa panan-aw kondili sa pagtoo. Kita kaha, mapadayonon ba sa pagsalig taliwala sa pagbugal-bugal ug pagbiay-biay kanato sa uban?

Ikaduha, nakasinati Siya sa dagway sa dautan apan nibuntog niini. Human sa tanan Niyang maayong nahimo, gihatod Siya sa paglansang sa krus. Ang Iyang pagpangulo, sama sa pagpili kang David sa unang pagbasa nagpakita nga molabaw gayod ang kaayo sa Dios. Nagmagahi Siya aron dili matarog sa bisan unsang moharong Kaniya nga kadaut. Sa mga kasinatian nato sa dautan, tawo man o kalamidad, giyera man o gutom, maisog ba kitang mobuntog niini pinaagi sa kalig-on sa pagtoo?

Ikatulo, mapasalamaton Siya kanunay sa dakung grasya sa Amahan. Sama sa awhag ni San Pablo, si Kristo kanunay mapasalamaton Ang Iyang pasalamat naghimo Kaniya nga madawaton sa mga mahinulsolon. Wala Siya nagsalikway sa mga nangayo og hinabang Kaniya kay nasayod Siya nga ang tanan nga anaa Kaniya gikan sa Amahan. Kita kaha, madawaton ba kita sa bisan kinsang magpakitabang kanato isip pasalamat sa grasya nga atong nadawat?

Niining kalibutan nga puno sa pagsulay taliwala sa mga dautan, ang gahum sa Dios nga makabuntog angay natong pasalamatan. Busa isip Iyang mga tinun-an, si Kristo maoy atong kapanaminan. Kinabuhi ta ug kinaiya isalig ug itahan ta kanunay sa Ginoo, ngadto kang Kristong hari sa pagtoo.