Kitang Tanan Managsuon

Balita: Duha ka asawa sa usa ka bana nag-away didto sa langit nag-ilog sa ilang bana! Makatoo kaha ta nga didto sa langit nagbinunlotay og buhok, nag-away ang kanhing mga asawa sa usa ka bana sa dihang nagkita sila uban sa ilang bana didto sa langit?

Si Kristo nagtudlo nga sa umaabot, ang lalaki ug babaye dili magminyoay ug dili na mangamatay. Ang angay nga banhawon mahisama na sa mga anghel, mahimong mga anak sa Dios. Kining pagkabanhaw mao ang naghatag og kaisog sa mga managsuon diha sa unang pagbasa nga mopuyo sa balaod sa Dios bisan pa man sila patyon. Alang kanila, ang kamatayon niining kalibutana walay gahum sa pagkabanhaw nga nagpaabot sa mga matarong. Mao nga si San Pablo sa ikaduhang pagbasa nag-ampo nga ang mga taga Tesalonica madasig sa pagbuhat sa angay ug mahimong matinud-anon kanunay. Siya misalig nga sila magmakanunayon diha kang Kristo.

Unang gihagit niining pagtulon-ana ang mga minyo. Ang bana ug asawa dili bulagon hangtod sa kamatayon. Busa sanglit ang bana ug asawa o ang kinabuhi sa pamilya mabulag man sa kamatayon, nan angay nga karon pa lamang higugmaon sa tiunay ang bisan kinsa diha sa panimalay. Sanglit kamatayon man ang makabulag sa bana ug asawa, nindot nga sa kinabuhing minyo ihatag ang tanang pagpangga samtang buhi pa.

Ikaduha nga gihagit mao ang mga pari ug relihiyoso nga gitawag sa pagpuyo sa kinabuhing dili minyo ug lakip na ang mga gitawag nga magpabiling ulay sa ilang kinabuhi. Sila gihagit nga ang ilang bokasyon mao nga mamahimong gawasnong makaalagad sa kadaghanan. Ang ilang kinabuhi mahimo untang andam kanunay sa pagmahal dili lamang sa usa ka tawo sa talagsaong paagi kondili alang sa tanan – bata o hamtong, kabus o adunahan, matuohon o dili – tanan ilang gakson sa mainitong pag-alagad isip ilang igsuon.

Ug sa katapusan gihagit kitang tanan. Ang tanan natong maayong buhat ug pantay nga pagtagad sa uban atong himuon kay kita managsama man og dignidad. Inig-kabanhaw nato, kitang tanan mahimo na man nga managsuon sa usa ka Dios Amahan. Busa huptan ta ang malukpanong pagdawat sa matag-usa kay kitang tanan managsuon.