4,000 ka mga PSL nagsaulog sa ika-48th PSL-KSP Anniversary

Kaniadtong November 17, 2013 ang mga PSL sa Archdiocese of Davao nagsaulog sa ika-48th nga anibersaryo sa PSL-KSP sa Holy Cross of Davao College gym, Davao City,ubos sa Tema: “Ginoo,dugangi ang among pagtoo.”
Ang maong kasaulogan usa ka bulawanong panahon alang sa mga PSL ug hugpong sa pagtulon-an aron makatabang sa pagpalawom ug pagpalambo sa pagkaalagad tungod sa mga mensahe nila ni: Arsobispo Romulo G. Valles,D.D., Fr. Bong Dublan ug Bro. Noe Dura nga usa ka kanhing Pastor sa Protestante nga na convert sa pagka- Katoliko.

Matud pa ni Abp. Valles sa iyang homiliya sa panahon sa santos nga misa, “Kon magtan-aw ako kaninyo karon, makaingon ako nga pagkanindot ug pagkabuhi gayud. Ang mga GKK mamahimong lig-on nga katilingban ug buhi gayud tungod sa mga gasa gikan kaninyo (mga PSL)”.

Dugang pa ni Abp. Valles,ang nakanindot niining maong panagtapok mao nga tinambongan sa mga PSL nga nagrepresent sa ilang matag parokya sa Archdiocese of Davao. Represented gayud ang 36 ka mga parokya. Kini nagdala sa kasaysayan sa ika 48 years gikan sa pagtisok sa liso sa programa ug kini nagasugod sa Sta. Cruz,Davao del Sur pinaagi sa mga PME fathers. Dugang pa niya, sanglit ang pag alagad Kanimo mao man ang walay kahinutubang kalipay, ug mao kini ang kamatuoran ngano nga miabot ug 48- anyos hangtod karon. Dili kay nanganhi kay anaay bugas apan ania tungod sa gugma sa pagpangalagad. Mao kini ang madasigong mensahe sa Archbishop sa Davao ngadto sa mga PSL.
Matud pa ni Fr. Joel Caasi, Director sa Archdiocesan Liturgical Center sa iyang pagtan-aw sa mga PSL, ang mitambong mikabat ngadto sa mga 4,000 kabuok ug nagkadugang ang gidaghanon sa matag tuig.
Aduna usay mga kaparian nga mi co-celebrate sa santos nga misa nga sila si: Msgr. Jimmy Gamboa, Fr. Dexter Veloso (OLLP Parish Priest), Fr. Johnny Autida (VDLR Parish Priest), Fr. Joel Caasi (ALC Director), Fr. Elvie Bordios (San Pedro Cathedral).

Si Fr. Bong Dublan ang unang speaker human sa santos nga misa, mipasabot sa resulta sa GKK validation.
Ang katapusang namulong mao ang kanhing 15- ka tuig nga pastor sa Protestante nga si Bro Noe Dura nga naconvert sa pagka Katoliko. Matud pa niya; sa 15- years niya nga pagka pastor sa Protestante, hilabihan ka daghang Katoliko nga iyang naconvert ngadto sa pagka Protestante apan iyang himatikdan nga bisan unsa niya kahanas sa bibliya ug pagmemorize sa mga bersikulo aduna gayuy kulang sa iyang kinabuhi ug iyang nabati ang kagutom sa kamatuoran. Sa kaulahian nasayran niya pinaagi sa iyang pagtuki nga ang Katoliko diay ang Mother Church ug wala nay lain ug hinungdan nga iyang gibiyaan ang iyang pagka Pastor sa Protestante ug nagpabunyag sa simbahang Katoliko. Daghan na usab nga mga Pastor sa Protestante nga iyang nakabig sa pagbalik sa matuod nga Mother Church nga mao ang Simbahang Katoliko.Siya nga kusog mudugmok sa mga larawan sa mga santos ug ni Mother Mary, karon siya nagpamatuod na nga si Mama Mary angay tahuron ug daygon kay siya ang unang midawat kang Jesukristo nga atong manluluwas pinaagi ni angel Gabriel. Ug daghan pa nga mga maugdang nga mga pagpahayag kabahin sa iyang pag-convert diha sa iyang pag balik sa Mother Church. Praise the Lord!